آذربايجان توركلري قديم دؤورلردن بو يانا آذربايجاندان علاوه اينديكي ايران، عراق، تركيه و گونئي قافقازين اكثر يئرلرينده بعضا سيخ بعضا ايسه داغينيق شكيلده ياشاييرلار. عموميتله آدي چكيلن بؤلگه آذربايجانليلارين تاريخي وطني ساييلير. بير قايدا اولاراق شووينيستلر و غرضلي شخصلر آذربايجان گئرچكليكلريني پرده له مك ايسته سه لر ده سوندا بير سيرا گئرچكليكلري اعتراف ائتمگه مجبور اولموشلار. آنتي تورك مؤوقعيندن چيخيش ائدن محمدرضا شعار 1326 هجري ايلينده يازديغي ”بحثي درباره زبان آذري“ آدلي اثرين 39- نجو صحيفه سينده يازميشدير: «بو گون ايرانين تقريبا 22 ميليون نفوسونون قطعي اولاراق ياريدان چوخونو تورك ديللي ايرانليلار تشكيل ائدير»1.

همين مسئله يه داير عؤمور بويو غرضلي آنتي تورك مؤوقعيندن چيخيش ائدن سيد احمد كسروي ده سوندا اؤز يالانلاريندان پئشمان اولاراق اعترافلاريندا يازميشدير: «ايران اهاليسينين اكثري توركدور، ايرانين تورك ديللي اهاليسي قديم توركلرين اؤولادلاريدير, توركلشميش فارسلار دئييل، بلكه اصلينده همين توركلرين بير سيراسي فارسلاشميشديرلار. ايراندا تورك ديلي محلي ديل يوخ, عموم اؤلكه ديليدير. تورك ديلينين فارس ديلينه اوستونلويو انكار ائديلمز حقيقتدير»2.

لاكين بير سيرا شووينيست و پان فارسيست قوه لر رئالليقلارلا  باريشا بيلمه ييب يا تحريفلره ال آتيرلار يا دا اؤز ديللري و ادبياتلاريندان چوخ فارس ديلي و ادبياتينين چيچكلنمه سينه خدمت گؤستره ن صفويلري تنقيد آتشينه توتورلار. گويا صفويلر فارس ديلي و ادبياتينين تنزولونه سبب اولموشلار. حالبوكي, همين تورك شاهلارينين ساراييندا فارسجا اونلارجا قيمتلي اثرلر يازيلميشدير. اصلينده تورك ديلينين اهميتي، اونون ايشلنمه دايره سينين گئنيشلگيني اؤرت باسدير ائده بيلمه گن بئله شووينيستلر آغيزلارينا گله ني يارميشلار. مثلا همين شخصلردن بيري  گويا فارس ديلينين و ادبياتينين تنزولونو صفويلرين تورك و شيعه چي اولمالاري ايله علاقه دار بيله رك, يازميشدير: « بو ايكي قروپ (توركلر و شيعه لر) فارس ديليني اؤز ديللري حساب ائتمه ديكلري اوچون اونا ماراق گؤسترمير، چيچكلنمه سي اوچون چاليشميرديلار. نتيجه ده فارس ديلي و ادبياتي تنزوله اوغرادي»3.

صفويلر دؤورونده تكجه آذربايجاندا دئييل بؤلگه ده, ائله جه ده بوتون ايراندا تورك فاكتورو اؤز اهميتيني آزاجيق گوسترمك امكانينيا ماليك اولموشدور. حتي پايتاختين «انگلتره لي شئرلي قارداشلاري- شاه عاباس - بير قروپ فارس شيعه روحانيلرينين پلاني چرچيوه سينده»4 اصفهانا كؤچورولمه سيندن سونرا دا تورك ديلينين عموم ايراندا نئجه بؤيوك اهميته ماليك اولماسيني بير چوخ خارجي سياحلار، ديپلوماتلار اؤز اثرلرينده عكس ائتديرميشلر:

توركيه توركجه سيني بيلن ايتاليان سياح پيترو دلاواله 18 دئكابر 1617-نجي ايلده اصفهان شهريندن دوستو ماريو اسكيپانويا مكتوبوندا يازميشدير: «ايراندا عموميتله فارسجادان چوخ توركجه دانيشيلير. خوصوصيله سارايدا و بؤيوك شخصلر اراسيندا... توركجه دانيشماق ايرانليلارين فارس ديلينه داها چوخ اهميت وئرمه سيندن ايره لي گلمير، اصلينده قوشون تماميله تورك منشالي قيزيلباشلاردان عبارتدير. شاهين قوللوقچولاري و مأمورلاري دا مختلف ملتلردندير. اونلار دا توركجه دانيشير و فارس ديليني بيلميرلر. اونا گؤره شاه و مأمورلاي دا قوشون و مختليف ايشلر اوزره توركجه دانيشيرلار و نتيجه اعتباري ايله بو ديل بوتون سارايدا –قادينلار و باشقالاري آراسيندا ياييلميشدير.»5

آلمانيالي حكيم ائنگلبرت كمپفئر 1684- نجو ايلده ايسوئچ سفيري و نماينده هئيتي ايله بيرليكده اصفهانا گلميش، بورادا اولدوغو ايللرده آذربايجان توركجه سينين ايشلنمه دايره سي ايله باغلي يازميشدير: «تورك ديلينين ايشلنمه دايره سي سارايا و باشقا يوكسك دايره لره دك ياييلميشدير. هر بير وظيفه لي و شخصيتلي انسانين توركجه بيلمه مه سي گئرچكدن بي آبريچيليق ساييليردي»6.

فريدريك فن هلشتاين طرفيندن سفيرليگه كاتيب كيمي روسيا و صفوي سارايينا گؤندريلميش آلمانيالي آدام اولئاريوس يازير: «تورك ديلي اصفهان سارايندا او قدر اهميته ماليك ايدي كي، نادير حالدا فارسجا بير سؤز ائشيتمك اولوردو»7.

شواليه ژان شاردن اؤز سفرنامه سينده يازير: «تورك ديلي قوشون و ساراي ديليدير. قادينلار و كيشيلر محض توركجه دانيشيرلار، خصوصيله اعيان اشراف عائله لرينده»8.

آدام اولئاريوس يئنه يازير :«فارسلار حدسيز ماراقلا تورك ديليني اؤگرنيرديلر.»9

 آدام اولئاريوس ائله جه ده اصفهان سارايندا سفيرلره وئريلن قوناقليقدا تورك ديلينين ايشلنمه سيني بئله تصوير ائدير: «ضيافت قورتارديقدا ائشيك آغاسي باشي توركجه دئدي: "آللاه آللاه دئيه ليم، آللاه آللاه و هامي آللاه آللاه سؤزونو تكرار ائتديلر.»10

صفوي دؤورونده اصفهانا گلميش سئر توماس هئربئرت يازميشديركي, او «همين سفرده قافقازدان گيلانا اورادان ايسه اصفهانا گئتميش، يول بويو شاهين قوشونو و اهالي ايله علاقه ساخلاميشدير. اونلارين هاميسينين ديلي توركجه دير و فارسجا بيلميرلر.»11

عيني زاماندا تورك ديلي مختلف طبقه لر آراسيندا ائله ياييلميشدير كي، دئمك اولار هاميسينين ديلي ايدي.12

صفوي دؤورونده آذربايجان توركجه سينين فارس ديلينه تأثيريني دريندن آراشديران بؤيوك عاليم زرينه زاده يازير: «آذربايجان ديلي صفويلر دؤورونده مختلف خالقلار (ائرمنيلر، گورجولر، كوردلر، تاتلار، تاليشلار، فارسلار و ساير) آراسيندا بين الخالق بير ديل كيمي ايشلنميش و بو خالقلارا منسوب اولان آداملار اؤز قارشيليقلي علاقه لرينده بو ديلدن استفاده ائديرديلر. بونلارين بعضيسي حتي آذربايجان ديلينده اثرلر ده ياراديردي.»13

آذربايجان توركجه سي صفويلردن سونرا دا چوخ بؤيوك ايشلنمه دايره سينه ماليك اولموشدور. روس شاعري م. ي. لئرمونتف 1837- نجي ايلده اؤز دوستو يازيچي س. آ. رازئوسكييه مكتوبوندا يازير: «روسيادان چيخاندان بري داغلاري آشديم، شوشادا، قوبادا، شاماخيدا اولدوم. تاتارجاني (آذربايجان توركجه سيني) اؤگرنمگه باشلاديم. فرانسيز ديلي آوروپادا واجيب اولدوغو كيمي بورادا و عموميتله آسيادا بو ديل عيني درجه ده واجبيدير.»14

ائله جه ده 19- نجو عصرين بيرينجي ياريسيندا قافقازا گلميش و بير مدت بورادا ياشاميش روس يازيچيلاريندان لئرمونتوف، بئستوژئو، مارلينسكي، شرقشوناسلاردان پروفسور م. لازاروو آذربايجان ديلينين نه اينكي قافقازدا حتي ياخين شرقده عمومي اونسيت واسطه سي اولدوغونو قيد ائتميشديرلر.15

آذربايجان توركجه سي ايراندا خوصوصيله صفويلر دؤورو قيد اولوندوغو كيمي بؤيوک اهميته ماليك اولماقلا ياناشي فارس ديلينه ده چوخ جيدي تأثير گؤسترميشدير. جون پئري يازير:
« اسلام تبليغاتچيلارينين ديلي يعني عرب ديلي فارس ديلينه تأثير گؤسترمه سي تعجب دوغورمايا بيلر. بئله ليكله تورك ديلينين آرتان نوفوذو گؤسترير كي، بو ديل محلي ديل دگيل و فارس ديلينه چوخ بؤيوك تأثير گؤسترميشدير.»16

فارس ديلينده ايشله نن طغار (تاخيل)، كشمش (كيشميش)، كاكوتي (ككليك اوتو)، قتق (قاتيق)، قوروت، آغز (آغيز)، قاب، قاشيق، قازغان (قازان)، قالي، ترغو (دارايي)، چاقو، قيچي و... . ائله جه ده ايلك دفعه صفويلر طرفيندن تطبيق ائديلن سيلاحلارين چوخو آذربايجاندا حاضيرلانديغي اوچون توپ، توفنگ، چاخماق كيمي سؤزلر فارس ديلينه كئچميشدير... آذربايجانليلارلا فارسلارين قارشيليقلي علاقه سيني آذربايجانليلارا خاص اولان و فارس ديلينده ايشله نن يئمك آدلاريندا, او جومله دن شيشليك، دلمه، قيمه، كماج (كوماج)، يخه (يوخا)، آش و سايره ده  ده گؤرمك مومكوندور.»17

 ح. زرينه زاده «فارس ديلينده آذربايجان سؤزلري –صفويلردؤورو» آدلي اثرينده فارس ديلينده ايشله نن آذربايجان سؤزلريني چوخ دريندن و علمي شكيلده آراشديريب و همين اثرين 67- نجي صحيفه سينده يازير: «حسابلاديغيميزا گؤره 600 سؤزدن تخميناً 275-ي صفويلر دؤورونده فارس ديلينه كئچميشدير.»18

 

قايناقلار

1-پروفسور زهتابي «ايران توركلرينين اسكي تاريخي» 1- نجي جلد، تبريز1999، صحيفه 9

2- سؤزوموز و خط سوم سايتي ائله جه ده «العرفان» ژورنالي جلد 8 نمره 2-3-4-5 سورييا1992 و1993

3-«جهانگشاي خاقان (تاريخ شاه اسماعيل)» تاليف 948- 955 هجري، مقدمه و علاوه لر: دكتر الله دتا مضطر، فارس ديلي اوزره ايران و پاكيستان تدقيقات مركزي –اسلام آباد 1986 ، صحيفه 9

4- حميد دباغي«صفوي شاهلاريندان اوچ آذربايجان توركجه سينده مكتوب» صحيفه14

5- «تريبون» ژورنالي نمره 4 ايسوئچ قيش 1999، صحيفه 74

6- «وارليق» ژورنالي ساي 3-82 ، تهران 1370 صحيفه  16

7- «تريبون» ژورنالي نمره 4 ايسوئچ، قيش 1999، صحيفه 75

8- «تريبون» ژورنالي نمره 4 ايسوئچ، قيش 1999، صحيفه 75

9- « وارليق» ژورنالي ساي 2-109، 3-110، تهران 1377 صحيفه19

10- «تريبون» ژورنالي نمره 4 ايسوئچ، قيش 1999، صحيفه 75

11- حميد دباغي« صفوي شاهلاريندان اوچ آذربايجان توركجه سينده مكتوب» صحيفه18 و سؤزوموز سايتي

12- «وارليق» ژورنالي ساي 2-109، 3-110، تهران 1377 صحيفه19

13- ح.ح. زرينه زاده « فارس ديلينده آذربايجان سؤزلري(صفوي دؤورو)» آكادئميا نشرياتي-باكي 1962، صحيفه52

14- М. Й. Полнойе сабрание сачинение, Т. 17 писмок С. А. Разевскомо ат 1940 стр. 522-524

15- ح.ح. زرينه زاده « فارس ديلينده آذربايجان سؤزلري(صفوي دؤورو)» آكادئميا نشرياتي-باكي 1962، صحيفه52

16-« وارليق» ژورنالي ساي 2-109، 3-110، تهران 1377 صحيفه 20

17-«شمش تبريز» قزئتي، تبريز،ساي95 ،«فارس ديلينده آذربايجان سؤزلري»

18- ح.ح. زرينه زاده « فارس ديلينده آذربايجان سؤزلري(صفوي دؤورو)» آكادئميا نشرياتي-باكي 1962، صحيفه67

Powered by OrdaSoft!