بؤيوک امپراتورلوقلار قوران تورک اولوسونون پوتئنسياليني دگرلنديرمک اوچون چوخ دا اوزاقلارا گئتمک لازيم دئييلدير. ساده جه 500 يوز ايل اوله قاييديب، دونيانين سياسي خريطه سينه اؤتري نظر سالديقدا، بو بؤيوک اولوسون بوتون غرب دونياسيني دوشوندورمه يه و يقين کي، قورخماغا وادار ائدن نئجه بؤيوک پوتئنسيالا ماليک اولدوغونو دويماق ائله ده چتين دئييلدير. بئله کي، ائله بيرينجي باخيشدان همين دؤورده دونيادا تورک اولوسونون نئجه آپاريجي مؤوقعيه ماليک اولماسي اؤزونو آچيق شکيلده بروزه وئرير. همين آپاريجي مؤوقع 150-100 ايل بوندان اؤنجه يه کيمي داوام ائتميشدير.

آسيادا 500 ايل اؤنجه هينديستان ياريماداسي داخيل اولماقلا بابور تورک ايمپئراتورلوغو (1858-1526) حاکيم ايدي. همين ايمپئراتورلوغون شيماليندا حال- حاضيردا چينده يئرلشن شرقي

 

تورکيستاندا کاشغار (اويغور) خانليغي (15- نجي يوز ايلليک-1877) مؤوجود ايدي. بونلارين شرقينده ايسه سيبير و اورتا آسيا تورک دؤولتلري و صفوي دؤولتي(1732- 1502)
حؤکمرانليق ائديردي. بونلاردان دا شرقده آسيا، آفريقا و آوروپانين بؤيوک حيصه سيني احاطه ائدن عثمانلي ايمپئراتورلوغو
(1922-1299)، قارا دنيزين شيماليندا ايسه کيريم خانليغي(1783-1441)، اوندان شيمالدا هشترخان خانليغي (1466-156)، قاسيم خانليغي(1552-1445)،قازان خانليغي (1437-1552) و ساير تورک دؤولتلري حؤکمرانليق ائديرديلر.

البته بئله بؤيوک پوتئنسيالا ماليک اولان تورک اولوسو، هله آتيللا دؤورونده (اوروپا هون ايمپئراتورلوغو 469-374) بيزانس، روما

 
 
 
 

 و آلمانلار دا داخيل اولماقلا بوتون آوروپاليلاري ديزه چؤکدوره رک1، اونلارين تاريخي يادداشيندا ايز بوراخميشدير. ائله همين دؤوردن ده آوروپا اينسانيندا تورک خوفو داوام ائتميش و سونراکي دؤورلرده داها دا گوجلنن بو اولوسون بيرليگيني پوزماق هر زامان اونلاري دوشوندورموشدور.

 
 (عثمانلي ايمپئراتورلوغو)
 
 

  سون 500 ايلين تاريخي حاديثه لرينه نظر سالديقدا ايسه، تکجه عثمانلي ايمپئراتورلوغونون تک باشينا، آوروپا دؤولتلريني نئجه ديزه چؤکدوردويونو گؤروروک. آوروپا و آوروپالي اوچون تورک عاميلي بير نؤمره لي تهلوکه کيمي، همين دؤوردن آوروپا دؤولتلرينين سياستيني تأثير دايره سينه سالميشدير. بئله کي، جون لوکک (جان لاک)، ديني دؤزوملولوک حاقيندا يازديغي مکتوبوندا رئمونسترانتلارا و آنتيرئمونسترانتلارا مخصوص کيلسه آراسيندا اختلافي آرادان قالديرماغا و کناردان باخان عثمانلييا ديققتي يؤنلتمه يه اشاره ائدير.2  

  بوتون آوروپا دؤولتلري اينگيلتره باشدا اولماقلا، اوزون مدتلي و قيسا مدتلي استراتئژي پلان حاضيرلاياراق، مؤوجود تورک پوتئنسياليني ضعيفلتمک اوچون هجوما کئچديلر. قيسا مدتلي استراتئژي پلان اوزره ايکي بؤيوک تورک دؤولتي يعني عثمانلي و صفوي دؤولتلريني محاريبه يه سؤوق ائتمک و بئله ليکله هم آوروپاني عثمانلي ايشغاليندان قوروماق، هم ده تورک پوتئنسياليني ضعيفلتمک سياستي داوام ائتديريلميشدير. هله

قاراقويونلولار دؤورونده همين استراتئژي پلانا استارت وئرن
 آوروپا دؤولتلري، صفويلر دؤورونده اوغور قازانديلار. "عثمانلي عليهينه بيرلشمه ني صفوي شاهينا (شاه اسماعيل) تکليف ائدن بيرينجي آوروپا سلطانلاري اسپانيا شاهي بيرينجي شارل و ماجاريستان شاهي ايکينجي لودويک ايدي."3  

1598- جي ايلده ايگيرمي آلتي نفردن عبارت آوروپا نماينده هئيتي اينگليتره لي سئرآنتوني و سئر روبئرت شئرلينين باشچيليغي ايله ايکينجي شاه عباسين سارايينا گلديلر. "روبئرت شئرلينين بو سفردن مقصدي ايکينجي شاه عباسين، عثمانليلارلا محاريبه يه باشلاماسيني مذاکيره ائتمکدن عبارت ايدي." 4   

آوروپاليلارين تحريکي و فيتنه کارليغي ايله ايکي يوز ايلدن آرتيق داوام ائدن عثمانلي - صفوي چکيشمه سي، بو ايکي بؤيوک دونيوي گوجه ماليک اولان تورک ايمپئراتورلوقلارينين گوجونو ضعيفلتمکله ياناشي، قارا دنيزين شيماليندان (دشتي قيپچاقدان) سيبير و اوزاق شرقه قدر اوزانان بؤيوک تورک اراضيسينين (1681- جي ايلده قاسيم خانليغي، 1556- جي ايلده قازان خانليغيني، 1557- جي ايلده نوقاي اورداسي، 1557- جي ايلده هشدرخان خانليغي، 1600- جو ايلده سيبير خانليغي و داها سونرالار 1783- جو ايلده کيريم خانليغي و 19- جو عصرده قازاق خانليغي)5 روسلار طرفيندن ايشغال ائديلمه سينه شرايط ياراتدي. همين پروسئسين داوام ائتديريلمه سي ايله سونراکي يوزايلليکلرده ايسه تورکيستانين باشقا تورک دؤولتلري (1868- جي ايلده بخارا خانليغي، 1873- جو ايلده خيوه خانليغي، 1876- جي ايلده کوکند خانليغي و 1885- جي ايلده تورکمنستان خانليغي)، قافقاز و شيمالي قافقاز تورک دؤلتلري و توپلولوقلاري، ائله جه ده کؤمکسيز قالان شرقي تورکيستان (کاشغار- تورفان خانليغي) 1877- جي ايلده چين طرفيندن ايشغال ائديلدي. بئله ليکله غرب دونياسي، باشدا اينگيلتره اولماقلا، تورک اولوسونون ضعيفله مه سي و حتّي محوي حسابينا بؤيوک روسييانين يارانماسينا شرايط ياراتديلار. حالبوکي, روسلار اصلينده اسکانديناو خالقي اولموش و خزر ايمپئراتورلوغونون (تورک ايمپئراتورلوغو) سون ايللرينده شرقه دوغرو حرکت ائده رک،  "روريکين باشچيليغي ايله 862- جي ايلده خزر قالاسي سامباتايا گليب، تجارت ائتمک اوچون اجازه آلير. روريکدن سونرا کنياز اولئق حاکيميته گله رک تورکلر طرفيندن قورولموش کييئو (کيف) شهريني اله کئچيردي."6 گؤروندويو کيمي روسلار اؤز تورپاقلاريندان قات- قات بؤيوک اولان تورک اراضيسيني (قارا دنيزين شيمالي و اينديکي اوکراينا اراضيسي داخيل اولماقلا، شيمالدا بوز دنيزي و شرقده ياپونيا حدودلارينا قدر اراضيني) ايشغال ائتديکدن سونرا، تورکلري دؤورون غيري- اينساني آسسيميلياسييا مئتودلاري (رئپرئسييا، دئموقرافيک وضعيتين دييشديريلمه سي و ...) ايله روسلاشديرديلار.

لاکين بونلار اينگيلتره باشدا اولماقلا غرب دونياسي نين، تورکلري ضعيفلتمک اوچون تطبيق ائتديگي اوزون مدتلي و قيسا مدتلي سيياستين تطبيقي نين دولايي يوللا نتيجه سيندن عبارت ايدي. يعني اصلينده همين قيسا مدتلي استراتژي پلاندا نظرده توتلان عثمانلي- صفوي محاريبه لري نتيجه سينده، عثمانلي و يا حتي صفوي دؤلتينين مدافعه ايمکانيندان محروم قالان ديگر تورک دؤولتلري روسلارين ايشغالچي هجوملارينا تک باشينا داوام گتيره بيلمه يه رک، ايشغال ائديلميشلر.

اون آلتينجي يوزايلليکده هوللاندييا، پورتوقالييا و داها سونرا اينگيلتره و ساير آوروپا دؤولتلرينين شرقه، دنيز سياحتي تشکيل ائتمه لري، اونلارين، تورک سولاله سينين حاکيميتينده اولان هينديستانا، ماراغينين آرتماسينا سبب اولدو. دنيزچيلييه داها گئج باشلايان اينگيلتره بو ساحه ده اؤز رقيبلريني اؤتوب کئچدي و هينديستانين بير نئچه يئريني ايشغال ائتدي.  "شرقي هيند کومپانياسي، مدرسده (1636)، بومبئيده (1668) و کلکتته ده (1686) محکملندي." 7  

بئله ليکله عثمانلي ايمپئراتورلوغو ايله محاريبه  آپاران آوروپا دؤولتلري، صفوي-عثمانلي اختلافلاريني قيزيشديريب، اونلاري محاريبه يه سؤوق ائتمکله، بير طرفدن کؤمکسيز قالان بير چوخ تورک دؤولتلري نين روسلار طرفيندن ايشغالينا شرايط ياراتدي، ديگر طرفدن ايسه، اينگيلتره، هينديستاندا بابور تورک ايمپئراتورلوغونو تدريجاً ايشغال ائديب، مستملکه يه چئويردي. هينديستانين ايشغال ائديلمه سي ايله بؤيوک تورک ايمپئراتورلوقلاريندان بيري چؤکموش اولسا دا، ايندي هم زنگين ثروتلره ماليک اولان بو اراضيني الده ساخلاماق، هم ده اوزاق استراتژي پلان اوزره شرقدن غربه اوزانان بؤيوک تورک زينجيرينين ان مهم حالقالاريندان بيريني (ايران تورک دؤولتيني) قيرماق پروريتئت تشکيل ائديردي. ميللتلشمه مرحله سينه قدم قويماقدا اولان آوروپا، بؤيوک تورک پوتئنسيالينين ياخين پرئسپئکتيوده بئله، دونيايا آغاليق ائتمک گوجونده اولدوغونو ياخشي بيليردي. اونا گؤره ده، هينديستاني الده ساخلاماق اوچون حاضيرلانان پلانلارلا ياناشي، شرقدن غربه اوزانان تورک زينجيرينين ان مهم حالقالاريندان بيريني (ايران حالقاسيني) قيرماق اوچون پلانلار جيزيلدي.

بيرينجي مرحله ده اينگيلتره، هينديستاني موستملکه ائتديکدن سونرا، بو اؤلکه ني ابدي اولاراق الينده ساخلاماق اوچون اويدورمالارا ال آتيب، هر واسيطه ايله اينگيلتره- هينديستان بيرليگيني اساسلانديرماغي قارشييا مقصد قويدو. 1786- جي ايلده اينگيلتره نين موستملکه سي اولان هينديستاندا چاليشان ويليام جونز، سانسکريت ديلي ايله بير سيرا آوروپا ديللري آراسيندا اوخشارليقلاري حيس ائتدي. او، بو ديللري هيند- آوروپا ديلي آدلانديردي.8 بو مسئله آوروپادا موستملکه چي دؤولتلرينين الينده, اؤز موستملکه سياستيني اساسلانديرماق اوچون ياخشي واسيطه يه چئوريلدي. بئله جه  "ديلچيليک نظرييه لرينين ائتنولوژي و عيرق ساحه لرينه ده شاميل ائديلمه سي مسئله سينده کريستوف ماينئرسين (1810- 1747) گؤردويو ايشلر بؤيوک رول اويناميشدير. ماينئرس، خالقلا عيرق آراسيندا علاقه نين مؤوجود اولماسينا تأکيد ائده رک، ديلچيليک تئرمينلريندن عيرقه عاييد ساحه لرين ايضاحيندا ايستيفاده ائتدي".9  بئله ليکله آبسورد هيند-آوروپا عيرقي مئيدانا چيخدي. بو نظرييه نين ياراديجيلارينين مقصدي بؤيوک بريتانييانين هينديستاندا موستملکه چيليگينين اساسلانديريلاراق، داوام ائتديريلمه سي ايدي. بئله کي، بو
نظرييه نين اساس بانيلريندن بيري فرئدريش موللئر (آلمانييا- اينگيلتره ديلچيسي) سؤيله ميشدير: "بريتانييا ايمپئرياليزمي واسيطه سي ايله ايکي هيند و آوروپا حيصه سينين (بريتانييا و هينديستان)      بيرلشمه سي آللاهين نيشانه لريندن بيريدير ".10  

هينديستاني الده ساخلاماق اوچون هينديستان- اينگيلتره بيرليگيني اساسلانديرماقلا ياناشي، اونو، ديگر دؤولتلرين ايشغاليندان دا قوروماق لازيم گليردي. خوصوصيله ناپالئونون هينديستانا هجوم ائتمه احتيمالي، هينديستان اطرافي اراضيلرين اؤيره نيلمه سي و بو اؤلکه نين اطرافيندا موحافيظه زوناسينين ياراديلماسي مسئله سي گوندمه گلدي. هينديستانا قونشو اولان ايران تورک دؤولتي ايسه بؤيوک اهميته ماليک ايدي. بو مسئله نين اهميتيندن خبري اولان جون مئلکوم (جان ملکم)  "1800- جو ايلده مکتوبوندا يازير کي، بوتون واختيمي بيزيم آز تانيش اولدوغوموز بو غئيري-عادي اؤلکه ني (يران تورک دؤولتيني) اؤيرنمه يه صرف ائديرم."11   

بئله ليکله ايران تورک دؤولتي ايله باغلي قيسا مودتلي و اوزون مودتلي استراتئژي پلانلارين ايجراسينين گئديشاتيندا، شرقشوناسليق و اونون مهم قولو اولان ايرانشوناسليغين غربده اساسي قويولدو. کمبريج، آکسفورد و ساير اونيوئرسيتئتلردن باشقا اينگيلتره نين شرقي هيند کومپانيياسيندا، هئليبوري آديندا شرقشوناسليق کوللئجي ده تأسيس ائديلميشدير. بو شرقشوناسليق مرکزلرينين فونکسيياسي، اينگيلتره موستملکه چيليگينه شرق اوزره مأمور و کادرلار يئتيشديريمکدن عيبارت ايدي.12 همين مأمورلار قئيد ائديلن استراتئژي پلانلارين ايجرا گئديشاتيني سورعتلنديرديلر.
آرتيق 19- جو عصرده اوزاق استراتئژي پلان آکتواللاشديقجا هينديستانين، هيند-آوروپاليلارين آنا يوردو اولماسي حاقيندا اويدوردوقلاري نظرييه لر سؤنوکدو. بو دفعه  ايران تورک دؤولتينده فارس عاميليني قالديرماق و همين نظرييه ني بو ايستيقامتده ايشه سالماق آکتواللاشدي. آرتيق ايران تورک دؤولتينده، تورکلرين بيرليگيني پوزماق اوچون  "فارس عاميلي آوروپاليلارين ديقتيني جلب ائتدي. آنقوئتيل دوپپئرون، ويليام جونس و هئردئر، هر بيري آيريليقدا فارسي، هيند- آوروپاليلارين (آريالارين) وطني تکليف ائتديلر. بعضيلري حتّي آوئستانين يازيلديغي ديلين، سانسکريت ديلي قدر تاريخه ماليک اولدوغونو ادعا ائتديلر." 13   

آوروپاليلارين موستمله چيليک مقصدي ايله اويدوردوقلاري  "آري"  سؤزونون ايسه ايندييه کيمي فارسلارين و ديگر ادعا ائتديکلري هيند- آوروپا خالقلارينين ديلينده بو معنادا اولماديغي علم عالمينه معلومدور. اصلينده، تميز، پاک و آرينميش معناسيني داشييان بو سؤز تورک سؤزودور. دارانين کيتابه سينده ايشله ديلن  "آريکا"  سؤزو ايسه عوصيانچي و آزغين معناسيدادير. نورمان شارپ و کونت هر ايکيسي همين  " آريکا "14  يعني عوصيانچي سؤزونو آري عيرقي کيمي وئرمکله، تورکلره قارشي قئيد ائديلن  "آري" عيرقيني ايجاد ائتديلر (اويدوردولار).    

  آرتيق بوتون ايمکانلار اوزاق استرتئژي پلان اوزره قئيد اولونان ايستيقامتده سفربر ائديلميشدي. اينگيلتره مأمورلاري واسيطه سي ايله، فارس ائتنوسو اساسيندا ايرانا تاريخ يازيلماغا (اويدورولماغا) باشلانيلدي.  "اينگيلتره مأمورو جون مئلکوم،  "ايران تاريخي"  اثريني يازماقلا ايرانشوناسليغين اساسيني قويدو. سئر جان مئلکومدان باشقا ايرانشوناسلارين بؤيوک اکثريتي ده اينگيلتره نين و يا اينگيلتره شرقي هينديستان کومپانيياسي نين رسمي دؤولت مأمورلاري ايديلر و تدقيقات ايشلريني ايراندا رسمي مأموريتلري جريانيندا حياتا کئچيريرديلر. اونلار، اينگيلتره طرفيندن ايرانشوناسليق تدقيقاتلارينا گؤندريليرديلر." 15   

هله شاه عباس دؤورونده آوروپادان گؤندريلن روبئرت شرلينين باشچيليغيندا صفوي سارايينا گلن هئيتين, تورکدن باشقا بو اؤلکه ده ديگر ائتنوسلارين، خصوصي ايله فارسلارين (اصلينده تاجيکلرين) ياشاديغي يئرلرده تاريخي آبيده آختارماسي و بيستون کيتابه لريني تاپمالاريني نظره آلماساق، جون مئلکومدان سونرا 1811- جي ايلين مارت آييندا جيمز موريه و ويليام اوزلي و سئر گور اوزلي هئيتي نين ساير عضولري ايران تورک دؤولتينين پايتاختي تهرانا گلمک اوچون بوشهره گلديلر. اونلارا، تهران ايستيقامتينده حرکت يولوندا معلومات توپلاماق مأموريتي وئريلميشدير. بريتانييا شرقشوناسلاري، شيراز اطرافيندا گويا ايرانين کئچميشي حاقيندا معلومات توپلاماق، تاريخي آبيده تاپيب، فاکت الده ائتمک ايسته ييرديلر. اونلارا بريتانييا خاريجي ايشلر ناظيرليگي طرفيندن تاريخي آبيده تاپيب، ساختالاشديرماق و فارس ائتنوسو، ائله جه ده اؤزلري طرفيندن اويدورولان آبسورد آريايزم نظرييه سي ايستيقامتينده ايرانا تاريخ يازماق و ايراني فارسلا باغلاماغا مأموريت وئريلميشدير. بئله ليکله همين قروپ  "تاريخي اهميتي اولان بير نئچه يئره باخيش کئچيريب و همين قروپون عضوو استون، شاپورون هئيکه لي يئرلشن شاپور ماغاراسيني آشکار ائتدي."16 

1818- جي ايلده ايسه ديگر اينگيلتره لي روبئرت کئرپورتئر، بيستون کيتابه سينين بيرينجي دفعه اولاراق اوزونو چيخاردي. اوندان سونرا اينگيلتره لي ضابيط رولينسون
) Sir Henry Creswicke (Rawlinson 1833- جو ايلده ايرانا گليب، بيستون کيتابه لرينين اوخونوشونون رمزيني کشف ائتدي.  "رولينسون، دارانين بيستونداکي بؤيوک کيتابه سينين تام شکيلده ترجومه سيني، لندنده کرالليغين آسيا جمعيتينه              (Royal Asiatic Society) تقديم ائتدي و رولينسونون يئنيدن     دوزه ليشي ايله چاپا حاضيرلاندي." 17  دئنيس رايت، رولينسونون بو يازيلارا ماراق گؤسترمه سي حاقيندا يازير:  "رولينسونون بيرينجي دفعه  بو ميخي يازيلارا ماراق گؤسترمه سي معلوم دئييل. بو مسئله ده يقين کي، جون مئلکوما آفرين دئمک لازيمدير. جون مئلکوم 1823- جو ايلده هينديستانا اوزون مودتلي سفرينده باجاريقلي گنج ظابيط رولينسونو حيمايه سي آلتينا آليب، اونو ايران ناغيللارينين سِحرينه سالدي".18 لاکين سون ايللرده بريتانييا باشدا اولماقلا آوروپاليلارين بئله فعاليتلرينين نه مقصد گوددويو و اونلارين نئجه کؤکلو اويدورمالارا يول وئريلديکلري اوزه چيخير. اونلار، اينديکي فارسا مخصوص اولمايان بير مدنيتي و ديلي ساختالاشديريب، فارسين آدينا يازماقلا، فارس اتنوسو اساسيندا ايران دؤولتچيليیي تاريخي نين اساسيني قويوب، ايران تورک دؤولتيني، فارس (تاجيک) دؤولتينه چئويرديلر.

بيستوندا رولينسون و ديگر امکداشلارينين قديم فارس يازيلاري آدي ايله آشکار ائده رک تقديم ائتديگي کيتابه نين ديلي، حاضيردا فارس ديلي کيمي تانينان (ايندي ايراندا فارس ديلي کيمي تانينان و دانيشيلان ديل اصلينده تاجيک ديليدير. فارس ديلين کؤکو اهمه نيلرين چؤکمه سي ايله کسيلدي) ديل ايله هئچ بير باغليليغا ماليک دئييلدير.  "حتّي شارپين دا اعتيراف ائتديگي کيمي اهمه ني دؤولتينين سقوطو ايله بو ياد ديلين کؤکو تاماميله کسيلدي." 19      

  بيستون يازيلارينين ديلينين قراماتيکاسيندا (مورفولوگييا و سينتاکسيس) ايسملر اوچ- کيشي، قادين و اورتا جينسه بؤلونور. پاراديقما ايسه - تک، ايکيليک و جمع فورماسيندا و سککيز حالتدن عيبارتدير.20 بونلار ايسه اسلاويان ديللرينه عاييد خوصوصيتلردير. حاضيرکي فارس ديلينده و ايرانين ديگر يئرلي ديللري، او جومله دن آذربايجان، خوراسان، لوريستان، زابل، سيستان و ساير يئرلرده دانيشيلان ديللرده ايسيم جينسه تابع دئييلدير. بو خوصوصيتلر فارس ديلينه تاماميله ياددير.21 اوسته ليک همين ديلين سؤز خزينه سينده کوللي ميقداردا اسلاويان ديللرينه خاص سؤزلر مؤوجوددور.

بونلاردان علاوه ، ايران تورک اؤلکه سينده موسلمان تورکلر و عربلردن فرقلي کيمليک ياراتماق اوچون، آهورامزدا (اصلينده آسسور آللاهينين آديدير)، قديم فارس ديلي متنلري، پهلوي ديلي، زردوشت ديني، مزدک ديني و ساير بئله فرقلنديريجي عاميللر اويدورولدو. حتّي قديم متنلر کيمي قلمه وئريلن بير چؤخ اوزدن ايراق آبيده لرين، سون يوزيلليکلرده اينگيلتره نين موستملکه چيليگينده اولان هينديستاندا اويدورولاراق محض قئيد ائتديگيميز مقصد اوچون يازيلديغي آشکارلانيب. عيني زاماندا آذربايجان و ايران تورکلرينه، ائله جه ده رئگيونون ديگر  خالقلارينا عاييد اولان مدنيت آبيده لريني، مدني اوغورلوق يولو ايله اهمه ني (هخامنشي) و ساسانيلرين آدينا يازميشلار. ميدييا و پارفييانين دا اويدورولان هيند-آوروپا و آري، يعني گويا فارسلارا عاييد مدنيت اولدوغو ادعا ائديلدي. بونلارين هاميسيندان مقصد يالنيز و يالنيز ايران تورک دؤولتينده فارس دؤولتچيليگي نين اساسيني قويماق اوچون تاريخي بازا ياراتماق و نتيجه ده ايراني فارس دؤولتينه چئويرمکله تورک بيرليگيني پوزماقدان عيبارت ايدي.

همين دؤورده قئيد ائديلن کؤکلو اويدورمالارلا ياناشي، ايران تورک دؤولتينين (قاجارلارين) ساراييندا نفوذ صاحيبي اولماق اوچون آشاغيدان توتموش، يوکسک روتبه لي مأمورلارا کيمي روشوت وئرمکله نفوذ ائده بيلديلر. بئله ليکله هم روشوتخورلوغو اؤلکه ده رواج وئرديلر هم ده, سارايا نفوذ ائديب، قئيد ائديلن ايستيقامتده ايشلريني ايره لي آپارا بيلديلر. فتحعلي شاه قاجار، 1800- جو ايلده باش ناظير حاجي ابراهيمي وظيفه دن کنارلاشديريب، اونو و قوهوملاريني اؤلدورنده، شوشترين حاکيمي ميرزه ابوالحسن خان ساراي آداملاري نين کؤمگي ايله اؤلومدن قورتاردي. او، سونرالار اينگيلتره سفيرليگي نين مونشيسي جيمز موريه ايله بيرليکده اينگيلتره يه يوللاندي. اورادا ميرزه ابوالحسن خان، سئر قور اوزلي نينSir Gore Ouseli)  (Bart مئهماندارليغي ايله فراماسونئري تشکيلاتينا داخيل ائديلدي.22 اينگيلتره دؤولتي ميرزه ابوالحسن خاندان ياخشي استيفاده ائده بيلمه سي اوچون، اونو چوخلو ميقداردا هدييه لر و پوللا ايرانا يولا سالدي. او، همين هدييه لري و پوللاري ساراي آداملارينا داغيداراق، سارايدا نفوذ قازانمالي ايدي.23 بئله ليکله ايران تورک دؤولتيني ايچه ريدن داغيدان ايکي پروسئسه استارت وئريلدي. بيرينجي يوزلرله يوکسک روتبه لي دؤولت مأمورو اينگيلتره نين جاسوسونا چئوريلدي. ايکينجي پروسئس ايسه، گله جکده اؤلکه نين بوتون ضياليلاريني  زهرله ييب، فارسچي ائده جک ماسونلوق جرياني ايدي. "همين دؤورده اينگيلتره نين دؤولت سياستيني پلانلاشديرانلار، ايران اوزره اينگيلتره نين سياستيني تام شکيلده تطبيق ائتمک اوچون فراماسون تشکيلاتلارينين مؤوجودلوغونو، ايرانليلارين فراماسون اولمالاريني و اينگيليس فراماسونلارينين ايرانا گؤندريلمه سيني لازيم بيليرديلر." 24   

همين پروسئسين بير نئچه اون ايلليک داوام ائتمه سي ايله، تکجه فارسلار دئييل، ايران تورکلري، ائلجه ده آذربايجان تورکلري نين ضياليلاريني دا تأثير دايره سينه سالديلار. بئله کي، اينگيلتره واسيطه سي ايله هينديستاندا فورمالاشديريلان فارس ايجماعسينين الي ايله، اورادا مقصديؤنلو اولاراق، اون يئددي- اون دوققوزونجو عصرلرده اينگيليس شرقشوناسلارينين گؤستريشي ايله حاضيرلانان ساختا  "دساتير" ،  "اوئستا متنلري" ،  "پهلوي متنلري" ،  "قديم فارس متنلري"  و ساير بئله ساختا متنلرين يازيليب، ائرادان اول فارس منبعلري کيمي قلمه وئريله مه سيندن سونرا، اونلار آوروپاليلار (باشدا اينگيليسلر اولماقلا) و اونلارين هينديستانلي مأمورلاري واسيطه سي ايله ايران تورک اؤلکه سينده ياشايان اينسانلارا آشيلاندي. سونراکي مرحله ده ايسه قئيد ائديلن تبليغاتين نتيجه سينده آذربايجان تورکلري اؤزلري ده بو پروسئسين آپاريجي قوووه سينه چئوريلديلر.

19- جو عصرين آذربايجانلي ضياليلاريندان اولان جلال الدين ميرزه قاجار (فتحعلي شاه قاجارين اللي سککيزينجي اوغلو) تهراندا ياشايان آوروپاليلارلا علاقه ده اولدوغو و اونلارين اثرلريني اوخودوغو اوچون اونلارين تاثيرينه دوشموش و ائرمني ميرزه مئلکوم خانين رهبرليک ائتديگي فراماسون تشکيلاتي نين (فراموشخانه) عضوو اولموش و اونون حيمايه سي آلتيندا همين تشکيلاتين ايجلاسلاري دا اونون (جلال الدينين) ائوينده کئچيريلرميش.25 جلال الدين ميرزه  "نامه خسروان"  آدلي ايران تاريخي اثريني ده يازميشدير. "بو کيتاب، هئچ بير عاغيل و منطيقله قبول  ائديلمه يه جک فورمادا قديم ايرانا قارشي مدح و تعريفلري احتيوا ائدن شرحلر و افسانه لردن عيبارتدير. خوصوصيله کيياني، پيشدادي و ديگر ميفيک سولاله لردن بحث ائدير. اونون اثري نين اساسيني غيري- علمي روايتلر، افسانه لر و يا  "شاهنامه"  تشکيل ائدير.26

جلال الدين ميرزه قاجارين آدي چکيلن اثريني اوخويان ميرزه فتحعلي آخوندوو، همين فراماسونلا مکتوبلاشيب و اينگيلتره نين آشيلاديغي ايدئيا ايستيقامتينده اوزون مودت بير- بيرلرينه ياخشي تأثير گؤستره بيلديلر. اوسته ليک  "جلال الدين ميرزه، هينديستان فارس ايجماعسيندان اولان (اينگيلتره نين قئيد ائديلن مقصدي حياتا کئچيرمک اوچون ايرانا گؤندرديگي خوصوصي ميسيونئري) تهران زردوشتلري نين دين خاديمي مانکجيله ده تانيش ائتدي. آخوندوولا مانکجئيين آراسيندا جيدي دوستلوق و عقيده بيرليگي ياراندي... "27 اهمه نيلرله (هخامنشيلرله) 2500 ايل قاباق تورپاغا باسديريلان و محو اولوب گئدن پارس (فارس) سؤزو، قاجارلارين سون دؤورونده اينگيلتره واسيطه سي ايله آشيلاناندان سونرا،آذربايجانين بير چوخ بئله ديرناق آراسي ضياليلارينين ديليندن دوشموردو. حتّي آخوندوو، مانکجئيه مکتوبوندا يازير:  "من ظاهيراً تورک اولسام دا پارس (فارس) سويوندانام " 28   

 همين دؤورده قاجار دؤولتينين باش ناظيرلري، ايران اوچون تاريخ يازان ضياليلار، آذربايجانين ضياليلاري، او جومله دن  "مشروطه چي سئيد محمد طباطبايي، مشروطه چي يئفريم خان، مشروطه شهيدي ميرزه ابراهيم آغا، حسن پيرنيا (قديم ايران تاريخيني يازان)، حسن موستوفي (موستوفي الممالک)، ابراهيم حکيمي (حکيم الملک)، ذکا الملک فروغي... ائله جه ده حسن تقي زاده تبريزي " 29 ، احمد کسروي و فارس شوونيزمينين اساسيني قويان ساير شخصلر فراماسون تشکيلاتي نين عضوو ايديلر. بو مسئله او قدر گئنيش ياييلميشدير کي، اينگيلتره ليلر اؤزلري ده بونا اعتيراف ائديرديلر. بئله کي، عثمانلي و ايران تورک دؤولتلري اوزره اينگيلتره نين تانينميش جاسوسو ميستر همفر عثمانلي و ايراني نظرده توتاراق يازير: "بو ايکي اؤلکه ده ماسونلوغا جلب ائتديگيميز آيري- آيري شخصلري دؤولت کورسولرينده يئرلشديرميشيک".30

 بريتانييادا يارانان و اساس مقصدي اينگيلتره نين دونيوي حاکيميتيني تأمين ائتمکدن عيبارت اولان فراماسونئري تشکيلاتلاري، دؤورون معلوم مسئله لرينده ده اويدورمالارا ال آتيرديلار. بئله کي، اونلار اهمني (هخامنش) شاهي ايکينجي کوروشو بابلو فتح ائده رک، يهودلاري اسيرليکدن قورتاماسي ايله باغلي ايراندا دئييرديلر: "ايکينجي کوروش بو ايشي ايله فراماسونئري تشکيلاتي ايله باغليدير و بو طريقتين فورمالاشماسيندا بؤيوک رولا ماليکدير" 31 حالبوکي، بو تشکيلاتين سون يوزيلليکلرده بريتانييادا يارانماسي معلومدور.

آرتيق 20- جي عصره قدر رئگيونون و خصوصيله، ايران تورکلري و آذربايجان تورکلري نين تاريخي, غربين فراماسونلاري و شرقشوناسلاري طرفيندن مقصديؤنلو شکيلده جيدي تحريفه معروض قالدي. هله رضا شاهين، اينگيلتره واسيطه سي ايله حاکيميته گتيريلمه سيندن قاباق، شرقشوناس کلمان هوار، اهاليسينين تخمينن ياريسيني تورکلر تشکيل ائدن ايران تورک دؤولتينده دانيشيلان ديللرين سياهيسيندا فارس ديلي و حتّي بير نئچه يوز و مين نفرليک ائتنوسون بئله ديلينه ايشاره ائدير و  اؤلکه نين اکثر اهاليسينين، يعني تورکلرين ديلينه اشاره ائتمير.32

اصلينده غرب دونياسي و اينگيلتره نين، فارس دؤولتچيليگيني ايراندا اويدورمالار واسيطه سي ايله فورمالاشديرماغينين سببي، اونلارين فارسلاري چوخ ايستمه سيندن ايره لي گلميردي. بلکه اونلار استراتئژي منافعلري اوغروندا بو ايش اوچون دريدن قابيقدان چيخيرديلار. بئله کي، بريتانييانين اينگيلتره خاريجي ايشلر ناظيري لورد کرزون، ايراني تنزلده قالاراق چورومه يه لاييق اولدوغونو و آنجاق بريتانييا ايمپئراتورلوغونون بو اؤلکه ده اولان منافعيي، بو اؤلکه نين جوغرافي مؤوقعيي و ... اوچون بونا ايمکان وئريلمه يه جگينه ايشاره ائدير.33

بريتانييانين، شرقدن غربه اوزانان تورک بيرليگيني پوزماق اوچون اوزون مودتلي استراتئگييا اوزره پلانينين اساس حيصه سي آرتيق حاضير ايدي. بير طرفدن ايران تورک دؤولتينده و رئگيوندا ايجتيماعي رأي فورمالاشديريلميش، ديگر طرفدن ايسه، فارس ائتنوسو اوزره ايران دؤولتچيليگي اوچون اويدورولموش تاريخي بازا ياراديلميشدي. مشروطه اينقيلابيندان سونرا 10 ياشيندا احمد شاهين، اؤلکه نين شاهي اعلان ائديلمه سي ايله اينگيلتره، هم اينگيليس مأمورلاري هم ده هينديستاندا فورمالاشديرديغي زردوشت- فارس ايجماعسينين نماينده لري واسيطه سي ايله آکتيوليگيني آرتيردي. 1919- جو ايل موقاويله سينه خالقين اعتراضي و همين موقاويله نين لغوي، اينگيلتره ني، خوصوصيله بريتانييانين هينديستان حاکيميتيني اوزون مودتلي پلاني آپئراتيو شکيلده حياتا کئچيرمه يه داها دا عزملي ائتدي. همين پلاني حياتا کئچيرمک اوچون ايسه اونلار چوخدان کادر حاضيرليغي گؤرموشدولر.

مانکجئيدن سونرا بير- بير اينگيلتره نين ديگر هينديستانلي فارس اجماعسيندا اولان شخصلر، او جومله دن کيخسرو جي و داها سونرا اونون اوغلو اردشير جي ريپورتئر، اينگيلتره نين سياسي نماينده سي و جاسوسو کيمي ايران تورک دؤولتينده کؤکلو دييشيکليکلره سبب اولدولار. 27 ياشينا کيمي  اينگيلتره ده تحصيل آليب، اينگيلتره نين موستملکه چيليک سياستلري اوچون خصوصي يئتيشديريلن اردشير جي ريپورتئر، 1893- جو ايلده هينديستان حکومتي نين نايبي و اينگيلتره نين تهرانداکي سفيرليگينين سياسي مشاويري کيمي ايران تورک دؤولتينه گلدي. او، مشروطه حرکاتي و اوندان سونراکي حاديثه لره تأثير گؤسترميشدير. سياسي علملر مکتبينده قديم تاريخ معليمي کيمي درس دئميشدير. او، اؤز خاطيره لرينده بو ساحه ده يازير:  "بوتون مرحله لرده، او جومله دن مشروطه حرکاتيندا، سياسي مکتبده معليمليک ائتديگيم دؤورده بوتون گوجومله، ايرانليلاردا ايرانپرستليک (اصلينده فارس پرستليک) روحونو اونلارا آشيلاديم و اونلاري بو ايستيقامتده تحريک ائتديم " 34

نهايت اردشير جي ريپورتئر، 1917- جي ايلين اوکتيابر آييندا رضا خانلا تانيش اولدو. لاکين رضا خان ساوادسيز اولدوغوندان اونو،  "يئني ايرانين تأسيسچيسي"  اولماغا حاضيرلاماق لازيم ايدي. اردشير ريپورتئر اؤز خاطيره لرينده يازير: "ساده ديلده ايرانين تاريخيني، جغرافيياسيني و اجتيماعي- سياسي وضعيتيني اونا ايضاح ائديرديم... عادتاً، اوزون مدت منيم صؤحبتيمه قولاق آسيب، آرادا دينجلمک اوچون دوروب چاي دمله ييردي و ايچيرديک."35 اردشير ريپورتئر، 4 ايل مدتينه رضا خاني يئني تأسيس ائده جک ايران دؤولتي نين باشچيسي کيمي يئتيشديرير. او، رضا خانلا "داواملي گؤروشندن سونرا، رضا خانين، اينگيلتره نين مقصدلري اوچون ايراندا گوجلو و متمرکيز دؤولت قورماغا ان ياخشي واريانت اولدوغو نتيجه يه گلدي و بيرينجي دفعه  اولاراق، رضا خاني، آيرون سايدا (بريتانييانين مأمورو) تقديم ائتدي. " 36  بئله ليکله 1925- جي ايلده ايران تورک دؤولتينده، اينگيلتره و اونون هينديستانلي مأمورلاري واسيطه سي ايله چئوريليش حياتا کئچيريلدي و اينگيلتره اؤز اوزون مدتلي مقصدلري اوچون ايراندا فارس دؤولتي نين اساسيني قويدو. اينگيلتره نين مستملکه چيليک مقصلري اوچون همين دؤولت طرفيندن فورمالاشديريلان فارس شوونيزمينين سون نسيل
نماينده لري بوگون فخرله تاريخيندن و دؤولتچيليگيندن دانشديقلاري ايران فارس دؤولتي, اصلينده بئله اوتانديريجي و
بي آبريچي تاريخه و دؤولتچيليک اساسينا ماليکدير. ايران فارس دؤلتچيليگينين تاريخي بازاسينين، اينگيلتره طرفيندن حاضيرلانماسي و چئوريليشين حياتا کئچيريلمه سي فاکتلاري اوزون مودت گيزلي ساخلانيلسا دا، معين مقاملاردا، اونلار اؤزلري بئله بو مسئله يه اعتيراف ائتمه يه مجبور اولموشلار. بئله کي، اينگيلتره، رضا شاهي اوغلو محمدرضا شاهلا دگيشرکن بي بي سي راديوسو خبرلرينده دئميشدي: "رضا شاهين مأموريتينين باشا چاتماسي- رضا شاهي بيز تاختا چيخارديق و بيز ده ايراندان خاريج ائتديک".37 

اينديکي ايران فارس دؤولتينين دؤولتچيليک تاريخينين 1925- جي  ايلدن قاباغا گئتمه مه سينه آرتيق هئچ بير شوبهه يوخدور. اونا گؤره کي، ايستيناد ائتديکلري ساختالاشديريلميش اهمني (هخامنشي) و ساساني دؤولتلرينين تاريخي ايسه اصلينده اينديکي فارسلارا يوخ بلکه قيصاص مقصديله آسسورلار طرفيندن ديدرگين ائديلميش يهودلار  واسيطه سيله رئگيونا گتيريلميش کؤچري طايفايا مخصوص اولماسي علم عالمينه معلومدور.38
   رضا خانين ايراندا حاکيميته گتيريلمه سي و تورک بيرليگيني پوزماق، ائله جه ده اينگيلتره مستملکه چيليگينين تأمين
ائديلمه سي ايستقامتينده ايران فارس دولتچيليگينين اويدورولاراق تأسيس ائديلمه سي ايله يئنه ده، يئني تأسيس ائديلن ايران فارس دؤولتينين گويا تاريخي اساسينين اولماسيني اساسلانديرماق مقصديله، اينگيلتره طرفيندن باشلانيلان تاريخي اويدورمالار پروسئسينه داوام ائتديريلدي. "رضا شاه حاکيميتي نين، خيدمتينده اولان واسيطه لردن بيري ده تاريخ يازماق ايدي. بو عصرده تاريخ يازماق، شرقشوناسلارين تدقيقاتي و يازديقلارينا اساسلانان قديم تاريخ اوزرينده کؤکلنميشدي. بو دؤورده تاريخ يازماغين خوصوصي اجتيماعي- سياسي مقصدي، ايرانين کئچميشي، خصوصيله قديم دؤورونون سياسي سيستئمينين استروکتورونو وئرمکدن عيبارت ايدي. اونلار، بئله ليکله رضا شاه ديکتاتوراسيني اساسلانديرماق ايسته ييرديلر. همين ديکتاتورا حاکيميتي و قورولان يئني دؤولتي اساسلانديرماق مقصديله، ايرانين سياسي سيستئميني، اهمني (هخامنشي) و ساساني دؤورونده ايداره چيليگين و قرارلارين ايمپئراتورلوغون مرکزيندن وئريلن تام متمرکز و گوجلو سياسي سيستئم کيمي اولماسي تصوير ائديليردي. حالبوکي، بونلارين هئچ بيرينين تاريخي اساسي يوخدور."39  بو مسئله لر اصلينده سونراکي مرحله ده ايران تورکلرينين آسسيميلياسييا پروسئسيني گوجلنديرمه يه خيدمت ائديردي.

غرب ميسيونرلري و شرق شوناسلاري، ائله جه ده اونلارين يئرلي ال آلتيلاري، يئني جه اساسيني قويدوغو دؤولتين آديني دا ساده جه "مماليک محروسه" (حاضيرکي دؤورده بيرلشميش ايالتلر معناسيني داشيير.) تئرمينيني لغو ائتمکله ايران کيمي ساخلاديلار. لاکين ايران سؤزونون فارسلارين اؤلکه سي معناسيندا تقديم ائتمک اوچون يئنه ده مختلف اويدورمالارا ال آتديلار. اونلار بو مسئله ده اويدوردوقلاري "آري" تئرمينيندن و اويدورولاراق گويا اوئستادان اوخودوقلاري "ائيرن وئجه" اولدوغونو ادعا ائتديلر. اصلينده بونلارين "ايران" تئرميني ايله هئچ بير   علاقه سي يوخدور. توران تئرميني ايله ياناشي ايشله نن "ايران" سؤزو ده ميفيک آنلاييش اولاراق، قديم تورکلرين آلپ ارتونقا داستاني ايله باغليدير. سونرالار تورک دؤولتينين حيمايه سي آلتيندا تورک ساراييندا فردوسينين اؤزونون ده يازديغي کيمي اويدوردوغو "شاهنامه" اثرينده ده ايران تئرميني ميفيک تئرمين اولاراق توران تئرميني ايله برابر ايشله ديلميشدير. تورانلا بيرگه ايران و عيراق (ايراق) تئرمينلري فارس سؤزو اولماديغي اوچون بو ديلده هئچ بير معنا کسب ائتمير و تورانا نسبتده  "ايران تورکجه ياخين معناسيندادير و عيراق (اوزاق) قارشيليغيندا"40 استفاده اولونور. ايران آدي، تورک- مونقول امپراتورلوغونا قدر آنجاق ميفيک خاراکتئر داشيميش و يالنيز تورک- مونقول امپراتورلوغو دؤورو، چينگيز خانين واريثلري يعني ايلخاني و جيغاتاي اولوسلوقلاري آراسيندا يارانان اختلاف نتيجه سينده همين ايران- توران ميفيک تئرمينلري اؤلکه آدي کيمي قرارلاشديريلميشدير.41 بوندان سونرا ايسه اينديکي ايران اؤلکه سي همين آدلا آدلانديريلميشدير.

  بئله ليکله اينگيلتره، قيد ائتديگيميز اوزاق استراژي پلانين اجراسي ايله تورک دونياسي نين ايران حالقاسيني قيرماقلا، تورک بيرليگيني پوزا بيلدي. البته اينگيلتره تکجه تورک دونياسينين ايران حالقاسي ايله کيفايتلنمه دي. او، "هينديستاندان بيرينجي دونيا محاريبه سينده بير ميليوندان آرتيق عسگر و بير ميليارد روپيه نقد پول آلميشدير. بو پوللارين چوخونو عثمانلي دؤولتيني پارچالاماغا صرف ائتميشدير."42 تورکييه نين يوکسک روتبه لي دؤولت آدامي ايله گؤروشن اينگيلتره جاسوسو لارئنس (Lawrence)، عثمانلي ايمپئراتورلوغونو محو ائتمک مقصدي گوددويو ايله باغلي آچيق شکيلده اعتيراف ائتميشدير: "سيزي يعني تورکلري محو ائتمک ايسته ديم، موفق اولماديم. کورديستان تشکيل ائتمک ايسته ديم، موفق اولماديم. فقط عربيستاني تشکيلاتلانديرماغا موفق اولدوم."43

بئله ليکله ياپونييادان آوروپانين اورتالارينا و آفريکانين غرب ساحيللرينه دک اوزانان تورک نفوذو 20- جي عصرده تنزوله اوغراديلاراق، محو ائديلمه يه محکوم ائديلميشدي. اوچ قيطعه نين حاکيمي کسيلن تورک ميلتيندن 20- جي عصرده يالنيز تورکيه رئسپوبليکاسي اؤز مستقيلليگيني قورويوب، ساخلايا بيلدي.

 

قايناقلار:

1- Dr. Cavad Heyət, “Türklərin tarix və fərhənginə bir baxış”, “Varlıq” jurnalının özəl sayı, Tehran 1377 h., s.20-23
2- Tərtib edəni: Hikmət Hacızadə, “Demokratiya: Gediləsi uzun bir yol”, Demokratiya və antidemokratiya antologiyası, Bakı, 2001, s. 61

3- راجر، سيوري، ايران عصر صفوي، ترجمه کامبيز عزيزي، چاپ سيزدهم 1384، تهران، نشر مرکز، ص. 104

4- آرمين، کسروي، بيستون، نبشته هاي آريايي، ص. 40، سايت کتابهاي رايگان فارسي و www.zoroaster7.persianblog.com

5- Bax: Rəfiq Özdək, “Türkün qızıl kitabı, II kitab, Bakı, 1997, yazıçı nəşriyyatı, s. 180-190

6- M. M. Hüseynov, “Dünya türklərinin müxtəsər tarixi”, Bakı, 1999, Elm nəşriyyatı, s. 51

7- ويل و آريل دورانت، جلد 10، رسو و انقلاب، ويراسته دوم، چاپ ششم 1378، تهران، شرکت انتشاراتي علمي و فرهنگي، ص. 78

8- "گونئي آذربايجان" ژورنالي، ساي 2، مهر 1382، رسول سواران، "نژادپرستي، آريائيسم و پان ايرانيسم" ص. 13

9- پرفسور شاپور، رواساني، نادرستي فرضيه هاي نژادي آريا، سامي و ترک، تهران، 1380، اننتشارات اطلاعات، ص. 68

10- "تريبون" ژورنالي، ساي 6، قيش 2001، ايسوئچ، عليرضا اردبيلي، "ظهور و افول افسانه هند و اروپايي"، ص. 271

11- دنيس رايت، انگليسي ها در ميان ايرانيان، ترجمه لطفعلي خنجي، مؤسسه انتشارات امير کبير، تهران 1359، ص. 174

 12- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 115

13- خلاصه و ترجمه از علرضا اردبيلي، "بتهاي آريايي" www.tribun.com  سايتدان گؤتورولموشدور.

14- ماهنامه ديلماج، شماره 7 و 8، تبريز، فروردين و ارديبهشت 1384، علي، موسي زاده، آريايي موهوم، ص. 74

15- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 116

16- دنيس رايت، انگليسي ها در ميان ايرانيان، ترجمه لطفعلي خنجي، مؤسسه انتشارات امير کبير، تهران 1359، ص. 175

17- رلف، نرمان شارپ، فرمانهاي شاهنشاهي هخامنشي، تهران، چاپ دوم 1384، مؤسسه فرهنگي و انتشاراتي پازينه، ص. 1

18- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 117

19- ناصر پور پيرار، تأملي در بنيان تاريخ ايران، کتاب اول، دوازده قرن سکوت، اشکانيان، نشر کارنگ تهران، 1381، ص. 67

20- رلف، نرمان شارپ، فرمانهاي شاهنشاهي هخامنشي، تهران، چاپ دوم 1384، مؤسسه فرهنگي و انتشاراتي پازينه، ص. 4

21- ناصر پور پيرار، تأملي در بنيان تاريخ ايران، کتاب اول، دوازده قرن سکوت، اشکانيان، نشر کارنگ تهران، 1381، ص. 59

22- اسماعيل رائين، حقوق بگيران انگليس در ايران، نوبت چاپ: نهم 1373، چاپخانه علمي، ص. 20

23- اسماعيل رائين، حقوق بگيران انگليس در ايران، نوبت چاپ: نهم 1373، چاپخانه علمي، ص. 22

24- اسماعيل رائين، حقوق بگيران انگليس در ايران، نوبت چاپ: نهم 1373، چاپخانه علمي، ص. 28

25- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 53

26- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 53

27- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 57

28- آخوندزاده، ميرزه فتحعلي، الفباي جديد و مکتوبات، به کوشش حميد محمد زاده، تبريز، 1376، نشر احيا، ص. 249

29- مؤسسه مطالعات و پژوهشهاي سياسي، اسناد فراماسونري در ايران، جلد دوم، تهران زمستان 1380، ص. 405

30- Mister Hemferin xatirələri (İngilis casusunun etirafları), ЗАО «Славянский дом книги» Москва 2003, s. 10

31- مؤسسه مطالعات و پژوهشهاي سياسي، اسناد فراماسونري در ايران، جلد اول، تهران زمستان 1380، ص. 92

32- هوار، کلمان، ايران و تمدن ايراني، ترجمه حسن انوشه، تهران، چاپ اول، 1363، انتشارات امير کبير، ص. 22

33- "تريبون" ژورنالي، ساي 4، قيش 1991، ايسوئچ، عليرضا اردبيلي، "دادنامه آذربايجان"، ص. 245

34- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 234

35- "تريبون" ژورنالي، ساي 4، قيش 1991، ايسوئچ، عليرضا اردبيلي، "دادنامه آذربايجان"، ص. 256

36- رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 235

37- دکتر شمس الدين، امير عطايي (ترجمه و تأليف)، صعود محمدرضا شاه به قدرت يا "شکوفايي ديکتاتوري" ص. 72

38- ناصر، پورپيرار، تأملي در تاريخ بنيان ايران، دوازده قرن سکوت! کتاب اول، برآمدن هخامنشيان، چاپ دوم، تهران، آذرماه 1379، نشر کارنگ، ص. 251 و براي اطلاعات بيشتر کل کتاب. 

39-  رضا، بيگدلو، باستانگرايي در تاريخ ايران، چاپ اول 1380، تهران، نشر مرکز، ص. 274

40- ماهنامه ديلماج، شماره 7 و 8، تبريز، فروردين و ارديبهشت 1384، علي، موسي زاده، آريايي موهوم، ص. 79

41- حسين، فيض الهي وحيد، نام ايران را مغولان بر اين سرزمين نهادند، و مراجعه شود به ترجمه مختصرالدول، ابن عبري، ترجمه دکتر مير فخرايي، مؤسسه مطالعات و تحقيقات فرهنگي (پژوهشگاه)، تهران، 1371، ص. 69

42- Mister Hemferin xatirələri (İngilis casusunun etirafları), ЗАО «Славянский дом книги» Москва 2003, s. 89

43- Politika Ansiklopedisi, Tercüman, Tercüman gazetecilik matbaasında dizilmiş ve basılmışdır, İstanbul 1982, s. 388.

Powered by OrdaSoft!