ساموئل آ. ويمس، آرکانزاس ايالتينده هازئنده اونلو حاکيم و حقوقچو ايدي. او آرکانزاس اونيوئرسيتئتي حقوق فاکولته سيندن حقوق دوکتوراسينا صاحيب اولموش و شهر شوراسيندا فعاليت گؤسترمکله بيرليکده آدي چکيلن ايالتين آناياساسينين يئنيدن دوزنلنمه سينده ايلگيلي قوروما سئچيلميشدير. 

ساموئل ويمس بيرچوخ مقاله نين يازاري اولوب عيني زاماندا چاليشقان بير آراشتيرماجي و سياح ساييلير. او عؤمرونون سونلاريندا ائرمنيلرين بؤيوک حوققابازليغي و حيله گرليگي کيتابلاري سيلسيله سينده کي اونلو کيتابي " ائرمنيستان، ترروريست خيريستييان اؤلكه سي نين سيرلري"(Secrets of A “Christian” Terrorist State - 2002)   اثريني قلمه آلدي.

ساموئل ويمس بو کيتابي يازابيلمک اوچون اؤز شهري ديشيندا واشينگتون، لوندون، پاريس، روما، موسکووا، ايستانبول و باشقا شهرلره يولجولوق ائديب بو اؤلكه لرين کتابخانالاري و آرشيولرينده بو زمينده کاپساملي و گئنيش آراشتيرمالارا گيريشميش و آدي چکيلن اثري قلمه آلميشدير. او، کيتابي نين اؤن سؤزونده ائرمنيستان آرشيولري نين اونون اوزونه قاپاديلديغيني و آمئريکاداکي ائرمني لوببيلري نين اونا، قارشي چيخديغيني و اونلارين طرفيندن تهديده اوغراديغيني سؤيله مکدير. بو کيتابين آمئريکادا اينگيليزجه ياييملانماسيندان بير مدت سونرا مؤليف سيرلي بير بيچيمده وفات ائدير.

"ائرمنيستان، ترروريست خيريستييان اؤلكه سي نين سيرلري"  کيتابي 2004- نجو ايلده باکيدا دا آذربايجان تورکجه سينه چئوريلميش و يايينلانميشدير. بيز بو مقاله ده ساموئل ويمسين بو کيتابداکي ايفشاچيليقلاري نين بير قيسمينه اشاره ائده جه ييک.

   ساموئل آ. ويمس کتابينين 13- نجو صحيفه سينده ائرمنيلرين سؤزده ائرمني سويقيريمينا يؤنه ليک اؤيکوله مه لرينه (ناغيل اويدورمالارينا) ايشاره ائديب، اونلارين بو مؤوضوعداکي ايديعالاري نين يالان اولدوغونو، ائرمنيلري رذيل دوروما
دوشوره جک معتبر تاريخي دليللرين وارليغيني وورغولاماقدادير. او، آرديندان ائرمنيلرين بو اؤيکوله مه دن آماجلاري نين آمئريکا و تورکيه دن بوللو دولارلار قوپارماق و اونو 150 ايلليک آسيليليغا صاحيب اولان اؤلكه لري نين ريفاهينا خرجلمک اولدوغونو يازير.

ساموئل آ. ويمس کيتابي نين 28- نجي صحيفه سينده ائرمنيلر و تورکلر آراسيندا اختيلاف و دوشمنلييين نئجه اولوشدوغونا و بو آرادا اختيلاف تؤره دن عاميله يعني روسلارا اشاره ائده رک، يازير: "روسيا اوردوسو عوثمانلي ايمپراتورلوغونا سالديرمادان اؤنجه موسلمانلارين گوون و اعتيماديني سارسيتماق و خيريستييانلاري سفربر اتمک مقصديله اؤز جاسوسلاريني بؤلگه يه گؤندردي. 1820- نجي ايلدن سونرا روسلار ائرمنيلره اؤزلرينه دؤولت قورماقدا يارديم ائده جکلري سؤزونو وئرديلر." 

"روسلار عوثمانلي ايله ساواشدا اينگيليسلر و فرانسيزلاردان گئريده قالماسينلار دئيه عوثمانلي دؤولتينين ييخيلما و ايشغاليندا ائرمني عاميليندن يارارلانماغي قرارا آلديلار. اونلار"بؤيوک ائرمنيستان"رؤياسيني ائرمنيلرين بئينينده بيشيريب اونلارا قارادنيزدن آغ دنيزه دک دوغو آنادولودا - يعني ائرمنيلرين هئچ بير زامان تاريخ بويو بير دفعه اولسون بئله ايشغال ائده بيلمه ديکلري بؤيوک بير يورددا- ائرمني اؤلكه سي ياراداجاقلارينا داير وعدلر وئرديلر. اصلينده تاريخده هئچ بير زامان بؤيوک ائرمنيستان مؤوجود اولماميش و بو مسئله روسلار طرفيندن تاسارلانميش بير دوشدن باشقا بير شئي دئييلدير".

او ايسه روسلارين بؤلگه يه گلمه سيندن اؤنجه تورکلرين و ائرمنيلرين دوستلوق موناسيبتلري مؤوجود ايدي. ساموئل ويمس بو مسئله يه اشاره ائده رک کيتابي نين 33- نجو صحيفه سينده بئله يازير: " 1453- نجو ايلده تورکلر اينديکي ايستانبولو فتح ائتديکدن سونرا، عوثمانلي سولطاني خيريستييانليغي اؤلکه ده رسمييته تانيدي و بورسانين ائرمني پاپازي هواکيم اواکيمي عوثمانلينين ائرمني خيريستييانلاري نين ديني ليدئري اولاراق، سئچدي. ائرمنيلر و تورکلر آراسيندا گليشن بو دوستلوق، سونراکي اوچ يوز ايل بويونجا دا دوام ائتدي و بو آوروپا اؤلكه لرينين رئگيوندا هله تبليغاتا باشلاماديغي دؤنم ايدي.

عوثمانلي سولطاني ائرمني کيليسه سينه يارديم اتديکدن سونرا، بيزانس حؤکومتي طرفيندن کيريما سورولمکده اولان 70 ميندن آرتيق ائرمنيني اورادان قورتاريب ائگئي دنيزي ساحيللرينده ايستانبولون گونئيينه يئرلشديردي.

بو ائرمنيلر سولطانين معتبر آرخاداشلاري اولاراق بيلينيرلردي و سولطان اونلارا بيرچوخ حاقلار و اؤزگورلوکلر وئرميشدي. بو مسئله لره باخماياراق بو ايمپراتورلوغون ائنيش و تنزولو دؤنمينده ائرمنيلرين بعضيلري عوثمانلي حؤکومدارلاري نين اؤزلرينه ائتميش اولدوغو ياخشيليقلاري اونوتوب حتي اينکار ائتديلر. سونوجدا، خايين ائرمني ليدئرلري تؤره دي و آوروپا دؤولتلري نين حيمايه سي آلتيندا او دؤولتلره طرفدارليق ائدرک عوثمانلي توپراقلاري نين قيدسيز شرطسيز ايشغالي اوچون مذاکره لره گيرديلر. بو آزليق ائرمني قروپو ايله مذاکره لر گيريشن ايلک دؤولت روسيا ايدي.

ساموئل ويمس ائرمنيلرين، روس جاسوسلاري آراجيليغي ايله تحريك ائديلمه سينه اشاره ائده رک عوثمانلي ايمپراتورلوغو توپراقلاريندا ائرمنيلرين ترروريست عمللرينين بيچيملنمه سي مؤوضوعسوندا بئله يازير: "1890 –نجي ايلده عوثمانلي ايمپراتورلوغو اؤلكه لري ايچه ريسينده کيچيک بير ائرمني ترروريست قروپو موسلمانلارين يوردونو، ماليني يئيه لنمک اوچون دئوريمجي عمللره باشلادي. اونلار، سون 500 ايلده تورکلرله قارشيليقلي دوستلوق و آنلاشما مناسيبتلرينده اولاركن عوثمانلي موسلمانلارينا قارشي ترروريست عمللره گيريشديلر.

1915-1914-نجي ايللره دک عوثمانلي ايمپراتورلوغونداکي بو ترروريست چته او قده ر کيچيک ايدي کي، تورکلر اونو اؤنمسه مه ييرلردي. روسيانين عوثمانلييا قارشي ايشغالچي ساواشي نين باشلاماسيندان سونرا، ائرمنيلر حسرتينده اولدوقلاري يوردلاري يئيه لنمک اوچون روسلارلا بيرلشديلر.

تورکيه ائرمنيلري، گوندوز اؤزلريني عوثمانلي اوردوسونون دوستو کيمي گؤسترير، گئجه ايسه ترروريست عمللرله عوثمانلي اوردوسونا اؤلدوروجو ضربه لر ائنديريرديلر. ائرمنيلرين بو ترروريست عمللري سونوجوندا، عوثمانلي حؤکومتي ساواش بؤلگه سينده اولان ائرمنيلري بو بؤلگه لردن کؤچ ائتديرمک زوروندا قالدي. چونکي ائرمنيلرين ريياکارليغي سونوجوندا تورکلر ترروريست ائرمنيلري ترروريست اولمايان ائرمنيلردن آييرد ائده بيلمه ييردي. نهايت بو دورومدا اؤزونو سالديرقان دوشمنين هوجوموندان و ائرمنيلرين ترروريست حمله لريندن قوروماق ايسته ين بير ميللتين خايين و ترروريست ائرمنيلري ساواش بؤلگه سيندن کؤچ ائتديرمکدن باشقا چاره سي يوخ ايدي".

ساموئل ويمس بو اولايلا و تورکلرين بو حاقلي و يئرينده حياتا كئچيرمك ايسته ديگي ايشله باغلي آمريکانين بو اؤلكه نين باتي ساحيللرينده ياشايان و ژاپونلارا يارديم ائتمه لري احتمالي سئزيلن ژاپونلاري کؤچ ائتديرمکده کي بنزر گيريشيميني اؤرنک وئره رک بئله يازماقدا: "ژاپونيانين آمئريکايا 7 دئكابر
1941-نجي ايلده كي سالديريسيندان سونرا، آمريکانين غرب ايالتلرينده ياشايان ژاپونلار، بو تورلو عمللرين سون اؤرنه يي اولاراق، کئچيجي ترانسفئرله قارشي قارشييا قالديلار. 19 فئورال 1942- نجي ايده فرانکلين روزوئلت اؤزه ل 9006 فرمانيني ايمضالاياراق ژاپونلارين کؤچ ائتديريلمه سينه امر وئردي."

ساموئل ويمس، ائرمنيلرين روسلارين آراجيليغي ايل اويونجاغا چئوريلمه سي ايله باغلي بئله يازير: "1808- نجي ايلده روس چاري بيرينجي آلئکساندير، ائرمني کيليسه سينين پاپازي دانيئله روسيايا يارديم اوچون عوثمانلييا قارشي جاسوسلوقلارينا گؤره بيرينجي درجه لي مقدس آننا مادالياسيني سوندو. روسلار باتييا دوغرو سالديريب عوثمانلي توپراقلاريندا ايلرلديکلرينده ائرمني کيليسه سي روسلارا يارديم ائديردي".

ساموئل ويمس معتبر تاريخي فاکتلارا و آنادولو بؤلگه سينده و چئوره سينده بولونان باتيلي تمثيلجيلرين يازي و نوتلارينا ايستيناد ائدرک ائرمنيلرين ايديعالاري نين اساسسيز اولدوغونو گؤسته رير. او کيتابي نين 41- نجي صحيفه سينده بئله يازير:
"آوگوست 1889- نجي ايلده بريتانيانين ارضرومداکي باش کونسولوسو آلباي (پولكوونيك) چئرمسايد، بريتانيانين ايستانبول بويوک ائلچيسينه راپورت وئريرکن "ائرمنيلرين سويقيريمي و موسلمانلارين حرملري نين چالينميش ائرمني قيزلاري ايله دولماسي مؤوضوعسوندا يازماق و دانيشماق گولونج بير آبارتما و شيشيرتمه دير."  دئيه يازير.

عيني زاماندا، توماس بويادجييان (بوياجييان) دئيه بير ائرمني اولان بريتانيا باش کونسولو يارديمجيسي بريتانيا بؤيوک ائلچيسينين اؤزونه عوثمانلي پاديشاهي نين ائرمنيلرين سويقيريمي مؤوضوعسونداکي فرمانينا گؤره سوروسونو جوابلارکن بئله بير فرمانين هئچ بير زامان چيخاريلميش اولماديغي جوابيني وئرير. بوياجييان آيريجا آرديندان، اؤزونون ائرمنيلرين شخصي مسئله لري اوغروندا بير- بيرلريني اؤلدوروب سوچونو موسلمانلارين اوزه رينه آتديقلاريني ثبوت ائدن بير سورو دليللري اولدوغونو يازير.

ساموئل ويمس بريتانيا باش کونسولو يارديمجيسينين
1889- نجو ايلين پاييزينداکي راپورتونا داياناراق، يازير:  "ائرمنيلر آزليق اولدوقلاري بؤلگه لرده موسلمانلار و خيريستييانلار آراسيندا دوشمنليك تؤره ديرديلر. ائرمني ترروريستلر بير نئچه موسلماني اؤلدوروب او بيريلرينين آراسينا اختيلاف ساليرديلار. بو داورانيشلارين اصيل سببي موسلمانلاري خيريستييانلارلا چاتيشمايا زورلاماق و داها سونرا گويا خيريستييانلار، تورکلر طرفيندن سويقيريما اوغراديلار دئيه کامپانيا باشلاتماق ايدي".

بو ترروريست اؤرگوت (داشناکسييون) اؤز اويه و طرفدارلارينا هر بير يئرده و هر بير شرطده تورکلري قورشونا ديزمه لري و گول له مه يي امر ائتميشدي. بو امردن ايمتيناع ائدن هر بير ائرمني فعال و جاسوس ايسه، اونلارين الي ايله اؤلدورولوردو.

ساموئل ويمس عيني زاماندا کيتابينين 46- نجي صحيفه سينده، يازير كي، سئر ائلليس بارتلئت فئورال 1895- نجي ايلده ائرمنيلرين سويقيريمي مؤوضوعسوندا گؤردوكلري و فيكيرلريني يايينلاميش و اورادا بئله يازيردي: "تورک- ائرمني اولايلاري مؤوضوعسوندا بو گئنيشليکده يايينلانان اؤيکوله مه لر (ناغيل اويدورمالاري) عموميتله يالاندان و خيالدان باشقا بير شئي دئييلدير و بو سؤيلنتيلر غرض و اؤفکه اوزوندن اويدورولموش و يؤنلنديريلمکده دير. بو تبليغاتچيلارين اصيل آماجي ائرمني عذابلاري قارشيسيندا اينگيلتره نين تورکيه عليهينه دويغولاريني دالغالانديرماقدير". بارتلئت  آرديندان يازيردي: "بو اساسسيز افسانه لر ائرمنيلرين دئوريمجي کوميته سينين اويدورمالاري اولوب و بو تبليغاتچيلارين و سرمايه لري ايله بو چيرکين عملين آرخاسيندا دوران پان اسلاويستلرين چيخارلاري و منافعيني تأمين ائتمک اوچون گئنيش بير بيچيمده آوروپادا يايينلانماقدا ايدي. "

بارتلئت عيني زاماندا، اؤزو شخصاً ائرمنيلرين عوصيانلاري نين شاهيدي اولان ايسپانيول جوغرافياچي م. کوسيموسون گؤردوكلرينه گؤره ده بو اولايلارين ائرمنيلرين سويقيريم ايديعالاري ايله ضديت تشكيل ائتديگيني يازير. کوسيموس شخصاً، ائرمنيلرين سويقيريمين گئرچکلشديريلديگيني ايديعا ائتديکلري بؤلگه لره اوغراميش و آچيقجا، دئيير: "بو اولايلارين بو گئنيشليکله ياييلماسي و بئله گؤستريلمه سي تاماميله تحريفلردن باشقا بير شئي دئييلدير. مينلرجه ائرمنينين قتل-عامي، اونلارين ناموسلارينا تجاووز، خالقين ايشکنجه ائديلمه سي و موسيبتلر، ساده جه تحريفلرين وحشيجه سينه ايجاديدير. " 

ساموئل ويمس کيتابي نين 35- نجي صحيفه سينده، بريتانيانين عسگري شاهيدلرينه يعني 1895- نجي ايلده عوثمانلي ايمپراتورلوغونا گؤندريلميش اولان چارلز نورمانين شاهيد اولماسينا ايشاره ائدير: "بئش ايل سوره سينجه آنادولودا تؤکولن قانلارين سوروملولوغو دوغرودان دوغرويا خينچاک کوميته سينين (ترروريست ائرمني اؤرگوتو) بوينونادير. "او، داها سونرا ائرمنيلرين موسلمانلار طرفيندن سويقيريما اوغراديقلارينا داير بو هاي- قيشقيريقلاري نين اساسسيز اولدوغونو يازير".

ساموئل ويمس، کيتابينين 35- نجي صحيفه سينده بئله دوام ائدير: عوثمانلي- روس ساواشيندا، موسلمان تورک اهالي نين بيرچوغو اؤلدورولوب و يا يوردلاريني ترک ائتمک زوروندا قاليرلاردي. ائله او زامان ائرمنيلر، آدي چكيلن بؤلگه لره يئرلشيرلردي. اينديکي ائرمنيستان جمهورييتي ده عيناً بو شکيلده ائرمنيلرين ايسکاني و آذربايجانلي موسلمانين ائويندن، يوردوندان قاچماق زوروندا بوراخيلماسي و سونوجدا بو بؤلگه لرده ائرمني چوخلوغونون رئاللاشماسي ايله ياراديلميشدير.

ائرمنيلرين ترروريست عمللري و روسيا ايله ساواشدا تورکلره اهانت ائتمه سي سونوجو، تورکلر ائرمنيلري ساواش بؤلگه لريندن ديگر بؤلگه لره كؤچورمه يي قرارا آلديلار. ساموئل ويمس اثرينين 54- نجو صحيفه سينده بو مسئله حاققيندا بئله يازير: "بو تاريخي دليل و فاكتا ديقت ائدين: عوثمانلي حکومتي 24 آپرئل
1915- نجي ايلده ايستانبولدا، ائرمنيلرين يئريني دگيشديرمه يي قرارا آلير. 3 گون سونرا، هنوز هئچ بير ائرمني شرقي آنادولودان كؤچ ائتديريلمه ميشکن ائرمنيلرين آچمييادزين کيليسه سينين ديني ليدئري روسيايا، عوثمانلي دؤولتي نين ائرمنيلري قتل ائتمه يه ال آتديغيني بيلديرير!  يئر دگيشديرمه اوپئراسيونو باشلامادان، سويقيريم نئجه باش وئرميش اولا بيليردي. حالبوكي بير نفر ائرمني بئله يئر دگيشديرمک اوچون يوکونو ده چاتميش دئييلدي!؟" 

روما و واشينگتوندا روسيا بويوک ائلچيليگينه ائرمنيلرين پروتئستولاريني دستکله مه امري وئريلميشدي. چونکي روسيا گئنيش تدبيرلرله آمئريکا دؤولتي و توپلومونون اجتماعي رأييني عوثمانلي و آلمانيا اؤلكه لرينه قارشي تحريک ائتمه يه چاليشيردي. بو بؤيوک يالانلار سونوجوندا ايتاليا بير آي سونرا ساواشا قاتيلدي و آمئريكا بيرلشميش شتاتلاري ساده جه ايکي ايل سونرا آلمانيا ايله ساواشا باشلادي.

آرتيق 27 آپرئل گونو روسيانين لوندونداکي بؤيوک ائلچيسي روسيا، بريتانيا و فرانسا حؤکومتلري نين عوثمانلي دؤولتينه اعتراض نوتاسي وئرمه لريني و تورکلرين سويقيريمدا سوروملو اولدوغونو بيان ائتمه لريني اؤنردي.

بريتانيا خاريجي ايشلر ناظيرليگيندن جورج ت. كلارک روسيانين بو اؤنريسيندن راحاتسيز اولدوغونو آچيقلايب بئله جواب وئرير: "اؤزوموزون ايديعا ائديلن بو سويقيريمي اينجه له مه ميز داها ياخشي اولاردي. هر حالدا بيز اؤلکه ميزين روما و واشينگتونداکي بؤيوک ائلچيلرينه، ائرمنيلرين ديني ليدئري نين آدي چكيلن اؤنريسي نين قبول ائديله بيلرليگي مؤوضوعسوندا او اؤلکه لرين گؤروشلريني اؤگرنمه لريني و روسيانين اؤنه ريسيني دستکله مه لريني تبليغ ائدريك." 

15 ماي 1915- نجي ايلده بريتانيانين روسياداکي بؤيوک ائلچيسي، اؤلكه سي نين خاريجي ايشلر ناظيري گارريه، روسيانين خاريجي ايشلر ناظيرليگينين ايتيفاق دؤولتلري طرفيندن عوثمانلي دؤولتينه بو اؤلکه لرين ليدئرلري نين ساواشين سونوندا هر تورلو  ائرمني سويقيريميندان سوروملو توتولاجاغينا داير اوياري وئره جگيني بيلديردي. روسيانين بو ناظيري آيريجا، اوچ موتفيق اؤلکه نين بو مسئله ني دستکله مک اوچون عيني گونده بيرليکده بير بيلديري يايينلامالاريني اؤنردي. 

23 ماي 1915- نجي ايلده عوثمانلي حؤکومتي ايلک اولاراق ائرمنيلرين ترانسفئري و باشقا بير بؤلگه يه يئرلشديريلمه سي مؤوضوعسوندا 4- نجو اوردو کوموتانليغينا امر وئردي. فقط طبيعي کي ائرمنيلرين ترانسفئري زامان آليجي بير ايشدي. آنجاق 30 مايدا عوثمانلي دؤولتي ناظيرلر کابينئتي ائرمنيلرين ساواشين اؤن جبهه لريندن جبهه آرخاسينداکي ديگر بؤلگه لره داشينماسي مسئله سيني اونايلادي. يئر دگيشديرمه اوپئراسيونو هنوز باشلاماميشکن، ايتيفاق دؤولتلري، روسيا، اينگيلتره و فرانسا، بو مسئله نين اونايلانماسيندان (قبول ائديلمه سيندن) 6 آي اؤنجه عوثمانليلارين ائرمني سويقيريميندا سوروملو اولدوقلارينا داير بيلديري چيخارميش، سکاندال باشلاتميشلاردي (هاي- قيشقيريق سالميشديلار)!"  

ساموئل ويمس، آرديندان معتبر تاريخي فاكتلارا داياناراق، يازير: "اصلينده ائرمنيلرين ديني ليدئري تورکيه نين ائرمني كؤچورولمه سي مؤوضوعسونو قرار آلماسيندان بيرنئچه هفته اؤنجه، يابانجي دؤولتلرين بو خوصوصدا فعاليته باشلاماسينا زمين اولوشدورموشدو. سويقيريم ايديعاسي هئچ بير گئرچکليک پايي داشيماز و تمامي ايله ائرمني پاپازي نين اويدوردوغو افسانه دير." 

کيليسه نين بو يالانجي و غرضلي افسانه لري ايله بيرليکده، بو مرکزين ديني ليدئرلري ائرمني آزليغي اولان عوثمانلي توپراقلارينداکي ترروريست و آيريليقچي عمللريني کؤروکله مکده ايدي. ساموئل ويمس بو مسئله لره اشاره ائده رك كتابينين 57- نجي صحيفه سينده يازير: "15 اييول 1915- نجي ايلده ائرمنيلرين ديني ليدئري بئشينجي گوورک، يوکسک ديني ليدئر پوغوس نوبارا مکتوب يازميش، او دا بريتانيا خاريجي ايشلر ناظيري سئر آرتور نيکولسون ايله تماس قورموشدو. بو يوکسک ديني ليدئر ايتيفاق دؤولتلريندن تورکيه نين آلتي ايالتينده باغيمسيز طرفسيز ائرمنيستان ياراتمالاريني ايسته دي. بو ديني ليدئر، حتي تيجاري ايليشکيلر قورولماسي آماجي ايله مئرسين واسيطه سي ايله سربست دنيزه بير چيخيش کوريدورو ياراديلماسي طلبينده ايدي. "

ساموئل ويمس، کيتابينين 59- نجو صحيفه سينده 1917 روسيا بولشئويک اينقيلابينا ايشاره ائدرک، سالديرقان روس قووتلري نين روسيايا دؤنمک زوروندا قالديغيني و تورکلرين اؤلكه سيندن گئري دؤندوکله رينده اونلارلا بيرليکده تورک توپراقلاريني ايشغال ائتمکده ايشتيراك ائتميش اولان ائرمنيلري ده او اؤلكه دن داشينماق مجبورييتينده اولدوقلاريني يازير. او داواميندا يازير: "ائرمنيلرين بو توپراقلاردان گيتمه سيندن بيرنئچه آي سونرا بريتانيا اوردوسو مين باشيسي ا. او. س. نوئل بؤلگه ني تفتيش ائتميش و گؤزلملري مؤوضوعسوندا بريتانيا حؤکومتينه بئله راپورت وئرير:" سفريمين سونوجو مؤوضوعسوندا دئيه بيله رم کي، بو آيلار بويونجا روسيا اوردوسو اونلارا رفاقت ائدن ائرمنيلرله ياز و ياي 1916- نجي ايلده ايشغال ائتديکلري توپراقلاري ويرانه يه چئويرميشلردي. هئچ شبهه دويمادان سؤيله يه بيله رم کي، تورکلر دوشمنلري اوچون بئله داورانامازلاردي. "اونون گؤرگو تانيقلاري و يئرلي آهالي نين سؤيلديکلري ايله آشاغي يوخاري عيني اولان گؤروشلرينه اساساً روسلار ائرمنيلرين تحريک و يارديمي ايله بؤلگه ده کي موسلمانلارين قتل- عامينا گيريشميشلردي".

ساموئل ويمس، داها سونرا كتابينين 88- نجي صحيفه سينده بئله يازير:  "ائرمنيلر گئري چکيليرکن آرتيق اوخلاري نين داشا دگديييني، نه اؤزلرينين نه ده روسلارين دوغو آنادولونو ايشغال ائده بيلمه يه جکلريني قاوراميشلاردي. باشقا سؤزله ائرمنيلر، دوغو آنادولونو ترک ائدرکن هر يئري و هر شئيي ييخيب ياخديلار، اهاليني قتل- عام ائديب ياغمالاديلار. ائرمنيلرين بو ترروريست عمللري نين شاهيدي اولان بؤلگه لردن بيري ارزينجاندير. قويولار موسلمانلارين جسدي ايله دولو ايدي. موسلمانلارين بدنلري نين دوغرانميش اعضاسي و گؤودسيز باشلاري ائولرين باخچالاري چئوره سينه داغيلميشدي. 606 شخصين جسديني قويولارا، خندقلره آتميشلاردي. البته اؤلدورولن سيويل اهالي نين سايي بونون بيرنئچه قاتي ايدي. آيريجا، اساساً يول چکمک اوچون شهرين ديشينا گؤتورولموش اولان 650 موسلمانين دا طالعي ده نامعلوم قالدي".                                                        ساموئل ويمس، كتابينين 60- نجي صحيفه سينده يازير: "ائرمنيلر بو اراضيني ايشغال ائتمک و يئيه لنمك اوچون چوخلوقدا اولان موسلمانلاري قتل- عام ائتمه يي قرارا آلديلار. اونلار موسلمانلاري قيريب، بو توپراقلاردا بير موسلماني دا ساغ بوراخماديقلاري تقديرده موسلمان اؤلكه سينده اؤزلرينه باغيمسيز ائرمني دؤولتي قورا بيله جکلرينه اينانيرلاردي. بو تئررورچو سياستين آماجي بو ايدي و بوگون آذربايجان اؤلکه سينده ده عيني سياست دوام ائتدي".

"ائرمنيستان، ترروريست خريستييان اؤلکه سي نين سيرلري" کيتابي نين 42- نجي صحيفه سينده، ائرمنيلرين ياشاديقلاري ايديعا ائديلن 6 ايالتده کي ائرمنيلرين و موسلمانلارين سايي اوزه رينده دورولور:  "1892- نجي ايلده بريتانيا خاريجي ايشلر ناظيرلييي جوغرافيا مرکزي، ائرمنيلرين ايديعا ائتديکلري
بؤلگه لرين اهاليسي مؤوضوعسوندا بو بيلگيلري يايينلادي:

ايالت

مسلمان

يونان

ارمني

ساير

جمعي

ارضروم

782 500

725 3

087 135

22

616 636

سيواس

514 839

433 76

433 170

 

015 086 1

دياربکير

644 377

440 9

189 79

233 45

506 471

 هارپوت

946 504

650

718 69

 

314 575

  وان

000 247

998 79

002 103

 

000 430

بيتليس

862 257

210

390 131

162 9

624 398

جمعي

748 687 2

093 90

815 665

419 157

075 601 3

 

يوخاريداکي تابلودا گؤروندويو كيمي ائرمنيلر ايديعاچي اولدوقلاري 6 ايالتين هاميسيندا آزليقدا ايديلر. بئله کي, قيد ائديلن ايللرده 3601075 کيشيليک اهالي نين ساده جه 665815 کيشيسي (49/18%) ائرمني ايدي. يعني اصلينده ائرمنيلر 2935260 غيري ائرمنيني يوخ ائديب و اونلارين توپراقلاريندا ائرمنيستان دؤولتي قورماق ايسته ييرلردي. عيني زاماندا بريتانيا خاريجي ايشلر ناظيرلييي جوغرافيا مرکزينين بو استاتيستيكاسينا اساساً، ائرمني اهاليسينين سايي ياريم ميليوندان بير آز چوخدور. بئله اولدوغو حالدا يئر دگيشمه نتيجه سينده نئجه جمعي 665815 نفر ائرمنيدن بير ميليون ياريم ائرمني اؤله بيلردي؟ عيني زاماندا نظره آلماق لازيمدير کي, بو استاتيستيكادان سونرا همين ائرمنيلرين بيرچوخو قافقازا مهاجرت ائديب روسلارين حيمايه سي آلتيندا ايروان خانليغين اراضيسينده مسکونلاشديلار و سونرالار آذربايجانين بو قديم اراضيلرينده ائرمنيستان رئسپوبليکاسيني قوردولار. 

ساموئل ويمسين اثرينين 143- نجو صحيفه سينده، ائرمني تاريخچيلري نين يازيلارينا و مؤوجود اولان ضديت و تحريفلره اشاره ائتمه سي ده ديقته لايقدير:  "هووانئسييان قافقازلارا ياريم ميليون آواره ائرمني نين اينتيقال ائديلديگيني يازير. هووانئسييان کيتابي نين باشقا بؤلوملرينده، محاريبه اوزوندن عرب اؤلکه لرينده مينلرجه ائرمني نين وارليغينا ايشاره ائدير. او کيتابي نين باشيندا، تورکيه نين ساواش بؤلگه سينده تخميناً بير ميليون ائرمني نين ياشاديغيني و كؤچورولدويونو يازير. ساده بير رياضي حسابلاما ايله ائرمنيلرين ايديعاسي نين يالانليغيني و ساختاليغيني آنلاماق مومکوندور. آيريجا، آمئريكا بيرلشميش شتاتلارينين بؤلگه راپورتونا گؤره، 1916- نجي ايلده عوثمانلي ايمپراتورلوغوندا ياريم ميليوندان بير آز چوخ ائرمني ياشاماقدا ايدي. بونون ديشيندا، سوريه، عراق، ايران و باشقا اؤلکه لرده يوز مينلرجه ائرمني ياشاييردي. 1915- نجي ايلده 5/1 ائرمني قتل ائديلميش اولسايدي، دوروم بئله اولا بيلمزدي.

اوسته ليک ساموئل ويمس، عوثمانلي داخيلي ايشلر ناظيرليگينه آييد 7 دئكابر 1916- نجي ايل تاريخلي بير بلگه يه ديققت چکير. بو بلگه ده،  "702900 ائرمئني كؤچورولموش، بو آماجلا 1915- نجي ايلده 25 ميليون کوروش پول خرجلنميشدير. 1916- نجي ايل اوكتيابر آيينين سونونادک، 86 ميليون کوروش خرجلنميش و بو ايلين سونونادک 150 ميليون کوروش خرجله نه جکدير. "  دئيه يازير. تورکلر ائرمنيلري ائتنيک تميزله مه يه معروض قويماق ايسته سه ايديلر او زامان ندن بو ايشي گؤرمه ييب و دؤولتين ماليه بحراني کئچيرديگي بير واختدا ائرمنيلرين ساواش بؤلگه سيندن يئرين دگيشديرمه سي اوچون 261 ميليون کوروش پول صرف ائتميشدير؟!

ساموئل ويمس، کيتابينين 98- نجي صحيفه سينده، ائرمنيلرين سايي خوصوصوندا، هووانئسييانين تورکيه يه يئرلشميش ائرمنيلرين ساييني هئچ بير بئلگه يه دايانمادان تقريباً 2 ميليون اولاراق گؤسترمه سينه اشاره ائدير و معتبر تاريخي دليللرله بو يالانچي ايديعاني چوروده رك  بئله يازير: "اصلينده 1915-نجي ايلده بوتون دونيادا بو سايدا ائرمني يوخ ايدي!" او، صحيفه
 62- ده ايسه بؤلگه نين تمامينداکي ائرمنيلرين سايي حاققيندا چئشيدلي قايناقلار طرفيندن سونولان استاتيستيکالارا دا يئر وئرير:

  فرانسانين وانداکي باش کونسولو م. زارچئشي:        1300000 

  فرانسيس دو پئرسئنس (1895):                         1200000 

  تورو مئنکيس:                                                1300000 

  لينچ (لينجه) (1901):                                     1158000 

  عوثمانلي ايستاتيستيکالاري (1905):                   1294851 

  بريتانيا ماوي کيتابي (1912):                            1056000 

  ل. د. كوونتئرسون (1913):                              1400000 

  فرانسا ساري کيتابي:                                        1475000 

  ائرمني ديني ليدئري اورمانييان:                            1600000 

  لئپسيوس:                                                    1600000   

 ساموئل ويمس عيني يئرده، يازير: "گونوموزده ائرمنيلر 5/1 ميليون ائرمنينين عوثمانلي تورکلري طرفيندن قتل ائديلمه سي مؤوضوعسوندا "بويوک افسانه" دن اصلينده ايگيرمينجي يوز ايلده کي ايلک ائتنيک تميزله مه حيکايه سيني ياراتميشلاردير. اونلارين ايديعاسي، يعني قتل ائديلميش 5/1 ميليون ائرمني آنادولو ائرمنيلرينين توپلام سايينين بئله بيرنئچه قاتي ايدي."   

ساموئل ويمس، "ائرمنيستان، ترروريست خريستييان
اؤلكه سينين سيرلري" کيتابينداکي قاپساملي و موكممل آراشديرمالاري ايله، ائرمنيلرين بو مقاله نين سينيرلاريني آشان سايسيز جينايت و حيله لريني ايفشا ائتميشدير. او بو ايفشاچيليقلاردان سونرا، يازير: "ائرمنيلر اؤزلريني مظلوم گؤسترمک و 1915 سؤزده سويقيريمي مؤوضوعسوندا دئديقودولار يايماقلا هله اؤز جينايتکار سياستلريندن ال چكمه ميش، ايگيرمينجي. يوز ايلين سونلاريندا قونشولاري آذربايجان جمهورييتينه سالديراراق بو اؤلکه نين توپراقلاري نين %20- دن چوخونو ايشغال ائتميش و قاراباغ ايله چئوره سيندکي بؤلگه لرده وحشي و قورخونج قتل- عاملارلا بير ميليون آذربايجانلي موسلمانين يوردوندان اولماسينا سبب اولموشلاردير."


® دیققت: مقاله فارسجا يازيلميش, تورکيه ده نشر ائديلن "تبريزين سسي" قزئتي و سايتي طرفيندن آنادولو تورکجه سينه ترجومه ائديلميش و همين سايتلا قزئتده وئريلميشدي. مقاله مؤلف طرفيندن تورکجه ترجومه دن آذربايجان تورکجه سينه اويغونلاشديريلميشدير. اونا گؤره ده ستاتلارين جومله قورولوشو, کیتابين اؤزو ايله قورولوشجا فرقلي اولا بيلر.

Powered by OrdaSoft!