Büüttün beni sän zor hem aar,
Yaptım sana pek çok zarar:
Kırdım fıdan bän daalarda
Otu biçtim hep dolayda.

Eer aar geldiyseydi sölä-
Yapmam bän şansora bolä.
Her gücendiysäydin, Bucaam,
Sölä bana, diişilecäm.

Küsü salt tutma, Vatanım,
Zerä acıyer benim canım,
Sızlêr fena bakışından
Hem kaşların dürüklüündän …

Tä büünnan-büün yaşêêrım bän,
(Sän prost ettin beni heptän )
Besleerim ii toprakları,
Hem koruyerım daaları.

Sesleerim hergün türküyü,
O uyudêr bütün küüyü.
Lüzgär bizä onu çalêr,
O türküsünnän kär büüleer.

Tä bu soy benim Vatanım-
Görüp onu, durêr kanım.
En pek severim bän Bucaa-
Allaa alır onu kucaa.

Powered by OrdaSoft!